Նախկին Հարավսլավիայի հարցով միջազգային քրեական դատարանը մերժել է սերբ ազգայնականների նախկին առաջնորդ Վոիսլավ Շեշելին 2 մլն դոլար փոխհատուցում վճարել՝ իրավունքների խախտման համար, հաղորդում է Agence France-Presse-ը:
Շեշելը պնդում էր, որ իր դատական գործընթացը միտումնավոր ձգձգվում է, որի արդյունքում ինքն առանց դատավճռի արդեն 10 տարի գտնվում է ճաղերի ետևում: Նրա խոսքերով՝ դատախազությունն այս ամբողջ ժամանակահատվածում չի կարողացել ապացուցել իրեն առաջադրված մեղադրանքի և ոչ մի կետ, ուստի իրեն բանտում պահելը համարվում է իր իրավունքների խախտում:
Դատավորները եկել են այն եզրակացության, որ Շեշելի պահանջները «ոչ մի բանով հիմնավորված չեն», ուստի նրա հայցն ամբողջությամբ մերժվել է:
Շեշելը նախկինում ևս դժգոհում էր, որ իր դատական գործընթացը ձգձգվում է, սակայն դատավորներն ամեն անգամ մերժում էին նրա բողոքները:
Շեշելը մեղադրվում է 1991-1993թթ. իրականացրած ռազմական հանցագործության մեջ: Նա կասկածվում է նախկին Հարավսլավիայի ոչ սերբ բնակչության նկատմամբ բռնություն կիրառելու, ազգային երկպառակություն սերմանելու, խոշտանգումների և սպանությունների մեջ: Դատախազությունը պահանջում է նրան դատապարտել 28 տարվա ազատազրկման:
Ինքը Շեշելն իրեն ներկայացված մեղադրանքները չի ընդունում և հայտարարում է, որ իր դեմ դատական գործընթացը քաղաքական ենթատեքստ ունի: Իմանալով իրեն ներկայացված մեղադրանքների մասին՝ նա 2003թ. կամավոր ներկայացել է Հաագա՝ հայտարարելով, որ պատրաստ է կանգնել դատարանի առաջ: Նրան անմիջապես բանտ են նստեցրել, որտեղ էլ գտնվում է մինչ այժմ:
