Մինչև հունվարի վերջ Թբիլիսիում տեղի կունենա Հայաստանի 3 հարևան երկրների տրանսպորտի նախարարների և աշխատանքային խմբերի նիստը` կապված «Բաքու-Թբիլիսի-Կարս» երկաթգծի կառուցման խնդրի հետ: Այս մասին http://bizzone.info վրացական կայքին հաղորդել են Ադրբեջանի տրանսպորտի նախարարությունից: Նիստի ժամանակ քննարկվելու են երկաթգծի շինարարության հետ կապված բոլոր հարցերը, մասնավորապես` երկաթգծի վրացական հատվածի լրացուցիչ ֆինանսավորման հարցը:
Ադրբեջանական կողմը պատրաստակամություն է հայտնել վրացական հատվածի շինարարության համար տրամադրել լրացուցիչ 500 մլն դոլար: Հիշեցնենք, որ այդ հատվածի շինարարության համար արդեն իսկ 200 մլն դոլար հատկացվել է Ադրբեջանի պետական նավթային ֆոնդից: Այդ 200 մլն դոլարը Վրաստանին է հատկացվել 25 տարով տարեկան 1% տոկոսադրույքով: Հիշեցնենք նաև, որ «Բաքու-Թբիլիսի-Կարս» երկաթգծի չկառուցված 105 կմ հատվածի 76 կմ-ը Թուրքիայի տարածքում է, 29 կմ-ը` Վրաստանի: Բացի այդ, կվերակառուցվի Վրաստանի տարածքի Ախալքալաք-Մարաբդա-Թբիլիսի երկաթգծային հատվածը, ինչը հնարավորություն կտա այդ հատվածով տարեկան 15 մլն տոննա բեռ տեղափոխել:
Ինչպես նախկինում նշել էր Ադրբեջանի տրանսպորտի նախարար Զիա Մամեդովը, «Բաքու-Թբիլիսի-Կարս» երկաթգծի շինարարական աշխատանքները նախատեսվում է ավարտել մինչև 2012 թ. հուլիս, սակայն կողմերն այժմ փորձում են արագացնել աշխատանքները` դրանց հիմնական մասը ավարտելով այս տարվա վերջին: Ծրագրված է երկաթգծով տարեկան 17 մլն տոննա բեռ տեղափոխել: Սկզբնական փուլում նախատեսված է ապահովել տարեկան 1 մլն ուղևորների և 6.5 մլն տոննա բեռի տեղափոխություն: