«Այսօր, երբ մի դարդից անցնում ենք մի այլ դարդի, մի ողբերգությունից՝ մյուս ողբերգության, ոտքներս դիպչում է քարին, և այդ ժամանակ ենք միայն զգում, որ պետք է փոխենք մեր ճանապարհը»,- այսօր լրագրողների հետ հանդիպմանը այս կարծիքը հայտնեց քաղաքական գործիչ Աշոտ Մանուչարյանը:
Նրա խոսքով՝ Արևմուտքում մեռնող համակարգի պատճառով, որը շարունակում է գոյատևել Հայաստանում, երկիրը մնում է դժվար իրավիճակում: «Նախկինում աշխարհն ավելի պարզ էր. կայսերը՝ կայսեր, Աստծունը՝ Աստծուն, իսկ հիմա բոլորը միայն հավատում ու ծառայում են փողին:
Ինչ վերաբերում է նրան, ինչն անվանում ենք ընտրություն, ապա դա ընտրություն չէ: Այդ պատճառով էլ առաջիկա ընտրություններին փոխվելու են միայն դեկորները՝ ոչ մի այլ բան չի փոխվելու:
Միաժամանակ, Հայաստանում կուսակցական պնակն այսօր այնքան մեծ կախման մեջ է, որ դրսից եկող փողի իրավունքը մեկ վայրկյանում կարող է փոխել ամեն բան՝ այն սոցիոլոգիական պատկերը, որ գոյություն ունի ընտրություններից առաջ»,- ասաց նա:
Աշոտ Մանուչարյանի խոսքով՝ 88-ին կառավարումը և ժողովուրդն ամբողջություն էին՝ ձուլված միմյանց: «Իսկ այժմ ամեն հաջորդ օր երանի ենք տալու նախորդ օրվան, որովհետև այս համակարգը ձևավորել են մարտի 1-ին մարդկանց գնդակահարած անձինք:
Ժողովուրդը պետք է հասնի այն գիտակցության, որ այս կյանքի հաջողակներն ամենևին էլ ոսկեզօծ զուգարանակոնքեր ու ոսկեպոչ ավանակներ՝ բենթլիներ ունեցող օլիգարխները չեն:
Մենք գլուխներս կախ գնալու ենք այնքան ժամանակ, քանի դեռ չկան մարդիկ, ովքեր գիտեն՝ ո՞ւր պիտի գնանք: Այժմ մենք առաջնորդվում ենք կեղծ իմաստուններով: Նրանք են առաջին կործանողները, բայց հերիք է՝ ժողովուրդը չցանկանա, որ նրանք գոյություն ունենան, և նրանք գոյություն չեն ունենա»,- նշեց նա:
Քաղաքական գործչի կարծիքով՝ փողի մարդուն իշխանություն մուտք գործել թույլ տալը մեծագույն հանցագործություն է: «Այդ տեսակ մարդիկ իշխանության լծակներն օգտագործում են որպես փող ստեղծելու լծակներ: Մենք բոլորս ապրում ենք մարդ-գազանի աշխարհում, որը ծնվել է փող դիզելու համար»,- ասաց Մանուչարյանը:
Պատասխանելով հարցին՝ կա՞ն արդյոք Հայաստանում քաղաքական ուժեր կամ մարդիկ, որոնք վեր են իր թվարկած վատ որակներից, քաղաքական գործիչը նկատեց, որ որոշակի ներուժ ունեցող անձինք կան ՀԱԿ-ում: «Եթե լավ նայենք, գուցե ՀՀԿ-ում էլ մեկ-երկու հոգու գտնենք»:
