Թուրքական Cumhuriyet թերթի փոխանցմամբ`2007 թվականի հունվարի 19-ին Ստամբուլում Հրանտ Դինքին սպանած Օգյուն Սամասթը կարող է ազատության մեջ հայտնվել 32 տարեկան հասակում:
Հիշեցնենք, որ 2011 թվականի հուլիսի 25-ին Ստամբուլի 2-րդ անչափահասների ծանր հանցագործությունները քննող դատարանը «ծրագրված սպանություն իրականացնելու համար» (21 տարի և 6 ամիս) և «ապօրինի ճանապարհով զենք կրելու համար» (1 տարի և 4 ամիս և 600 թուրքական լիրա տուգանք) Սամասթին դատապարտել էր 22 տարի և 10 ամիս ազատազրկման։
Երեկ էլ Թուրքիայի Վճռաբեկ դատարանը գրեթե անփոփոխ թողեց Սամասթի դատավճիռը՝ որոշելով միայն կրկնակի կրճատել ապօրինի զենք կրելու վերաբերյալ սահմանված տուգանքը՝ այն իջեցնելով մինչև 300 լիրայի (166 դոլար):
Թուրքական օրենքներով՝ Սամասթը կարող է ազատության մեջ հայտնվել իր պատժաժամկետի 2/3-ը կրելուց հետո: Իսկ դա նշանակում է, որ նա բանտում պետք է անցկացնի մոտ 15 տարի: Քանի որ 1990 թվականին ծնված Սամասթի ազատազրկման ժամկետը հաշվվում է 2007 թվականի հունվարի 20-ից (5 տարի և 2 ամիս), նա կարող է ազատության մեջ հայտնվել 10 տարի անց՝ 32 տարեկան հասակում:
