Եվրամիությունը ստիպված կլինի ընդլայնել Բելառուսի հանդեպ պատժամիջոցները, եթե ազատ չարձակվեն քաղաքական բանտարկյալները: Այդ մասին, ինչպես հաղորդում է РИА Новости-ն, հայտնել է Լեհաստանի ԱԳՆ ղեկավար Ռադոսլավ Սիկորսկին:
«Մենք հույս ունենք, որ քաղբանտարկյալներն ազատ կարձակվեն, եթե ոչ, ապա ԵՄ–ն ստիպված կլինի ընդլայնել պատժամիջոցները»,- հայտարարել է նա:
Սիկորսկին ընգծել է, որ Բելառուսի իշխանությունները երկրում «պատասխանատվություն են կրում քաղաքացիների կյանքի համար»:
Այսօր՝ ավելի վաղ հաղորդվել էր, որ ԵՄ ԱԳ նախարարների խորհուրդը մարտի 23-ին կքննարկի իրադրությունը Բելառուսում: Եվրոպական արտաքին քաղաքականության ծառայության բարձրաստիճան ներկայացուցչի խոսքերով՝ «կարող են ուժեղացվել ԵՄ սահմանափակող միջոցները» Բելառուսի հանդեպ` հաշվի առնելով «իրավիճակի նոր սրումը»:
Ավելի վաղ Եվրախորհրդարանի մարդու իրավունքների ենթահանձնաժողովի ղեկավար Բարբարա Լոխբիլլերը Բրյուսելում հաղորդել էր, որ ԵՄ խորհուրդը լրացուցիչ սահմանափակող միջոցներ է պատրաստում Մինսկի հանդեպ:
Բելառուսի հանդեպ ԵՄ պատժամիջոցները ներմուծվել էին հակակառավարական ակցիաների դաժանաբար ճնշելու արդյունքում, որոնք տեղի էին ունեցել 2010 թվականի դեկտեմբերին նախագահական ընտրություններից հետո, ինչպես նաև մարդու իրավունքների այլ ոտնահարումների պատճառով:
