ԼՂ նախկին արտգործնախարար Արման Մելիքյանն այնքան էլ լավատեսական չի համարում ԵԱՀԿ Մինսկի խմբի ամերիկացի համանախագահ Ռոբերտ Բրադկեի այն հայտարարությունը, որ ղարաբաղյան հակամարտությունը 20 տարի անց կարգավորված կլինի, և որ խնդրի կողմերն այժմ առավել մոտ են խնդրի լուծմանը, քան 20 տարի առաջ: Այս մասին նա ասաց «Առաջին լրատվական»-ի հետ զրույցում:
«Գուցե Բրադկեն մի բան գիտի, որ մենք չգիտենք, որն էլ նրան խնդրի կարգավորման հույս է ներշնչում: Եթե խոսքն ամերիկյան լուծման մասին է, ապա գուցե իսկապես ամերիկյան կողմը շատ մոտ է դրան»,- ասաց Արման Մելիքյանը:
Նրա խոսքով, Մադրիդյան սկզբունքները տարածաշրջանում երկարաժամկետ խաղաղություն և խնդրի լուծում չեն ապահովել, չեն ապահովում և չեն ապահովելու: «Ինչ վերաբերում է Բրադկեի այն մտքին, որ ղարաբաղյան հակամարտությունը 20 տարի անց կարգավորված կլինի, ապա սա շատ կոնկրետ հայտարարություն է: Գուցե ամերիկացի համանախագահն ինչ-որ կերպ կարողացել է դա հաշվարկել: Վերջին հաշվով հակամարտությունը 24 տարվա պատմություն ունի, այն 88 թվականից ի վեր է: Մինչդեռ համանախագահներից ոմանք փորձում են այն 1992 թվականից սկսել: Հենց այստեղ էլ Բրադկեն էապես սխալվում է: Այդ առումով սխալ են կառուցված նաև Մադրիդյան սկզբունքները: Քանի դեռ որևէ մեկը համարի, որ ԼՂ հակամարտությունը սկսվել է 1992 թվականին և 20-ամյա պատմություն ունի, խնդիրը լուծում չի ունենա»,- ասաց Արման Մելիքյանը:
Նշենք, որ ԵԱՀԿ Մինսկի խմբի ամերիկացի համանախագահ Ռոբերտ Բրադկեն «Ազատություն» ռադիոկայանի հետ հարցազրույցում ասել է. «Կասկած չկա, որ մենք այսօր առավել մոտ ենք կարգավորմանը, քան 20 տարի առաջ, այսօր կողմերը պատկերացնում են` ինչ տեսք պետք է ունենան կարգավորման հիմնարար սկզբունքները: Հիմնարար սկզբունքները այսօր պարզ են առավել, քան երբևէ, և դա է հենց 20 տարի շարունակվող բանակցությունների իրական առաջընթացը:
Միջնորդ երկրներն ու համանախագահները պարբերաբար հայտարարում են, որ ստատուս քվոն անընդունելի է, և այդ պատճառով, կարծում եմ, որ 20 տարում պետք է լուծենք այս խնդիրը»,- ասել է Բրադկեն և ընդգծել. «Մենք չենք կարող 20 տարի անց հետ նայել և տեսնել այն իրավիճակը, ինչ ունենք այսօր»:
