ԱՄՆ առաջին տիկնոջ մամուլի քարտուղար Օլիվիա Էլեիրը «ոչ տեղին» է համարել դերասան Ռոբերտ դե Նիրոյի կողմից «սպիտակ առաջին տիկնոջ» մասին արված կատակը Միշել Օբամայի ներկայությամբ:
Վաշինգտոնյան The Hill թերթը գրում է,որ երեկ երեկոյան Նյու Յորքի ռեստորաններից մեկում Միշել Օբաման միջոցառում էր կազմակերպել՝ ամուսնու ընտրարշավի համար միջոցներ հավաքելու նպատակով: Հանդիպմանը հրավիրված են եղել նաև շոու բիզնեսի ներկայացուցիչներ:
Հենց այդ ժամանակ էլ դե Նիրոն հավաքվածներին հարցրել է, թե արդյոք նախագահի մյուս թեկնածուների կանայք պատրաստ են «սպիտակ Առաջին տիկին» դառնալ: «Կալիստա Գինգրիչ, Քարեն Սանտորում, Էնն Ռոմնի,- թվարկել է դերասանը նրանց անունները:- Դուք իրո՞ք կարծում եք, որ մեր երկիրը պատրաստ է սպիտակ առաջին տիկնոջ»: Ի պատասխան սրահից աբացականչել են. «Ոչ»: «Շատ վաղ է, չէ՞»,- շարունակել է դերասանը:
Հաջորդ օրը Միշել Օբամայի գրասենյակը հաղորդագրություն է տարածել, որում դերասանի հայտարարությունն «անթույլատրելի» է համարել:
Ի պատասխան Ռոբերտ դե Նիրոն պաշտոնական հայտարարություն է տարածել, որում բացատրել է, որ որևէ նպատակ չուներ վիրավորել որևէ մեկին, հատկապես Միշել Օբամային:
Դերասանի խոսքերը վրդովել են նաև նախագահի թեկնածու Նյութ Գինգրիչին, որը պաշտոնական հայտարարությամբ պահանջել է ներողություն խնդրել Բարաք Օբամայից:
«Իմ կնոջ, ինչպես նաև Քարեն Սանտորումի և Էնն Ռոմնիի անունից ես հայտարարում եմ, որ երկիրը պատրաստ է նոր սպիտակ տիկնոջ, բայց դե Նիրոն չպետք է խոսի այդ մասին ռասիստական արտահայտություններով»:
