«Թամանյանի հիմնական արածն այն էր, որ նա ոչ թե քանդեց քաղաքը, այլ պարզապես այլևս չկարդացվող տեքստը փոխեց նոր տեքստով` ձգտելով մաքսիմալ պահպանել այն ամենակարևորը, որը հնարավոր էր հին քաղաքից պահպանել»,- այս մասին լրագրողների հետ հանդիպմանը նշեց «Սարդարապատ» շարժման նախաձեռնող խմբի անդամ Գարեգին Չուգասզյանը:
Ըստ նրա՝ Թամանյանը ոչ թե վիրահատության ենթարկեց Երևանը, այլ վերակենդանացրեց այն և նոր քաղաք ստեղծեց։ «Այս քաղաքն ունի իր գաղափարախոսությունը, որը կարելի է տեսնել գլխավոր հատակագծի մեջ»,- նկատեց բանախոսը:
Ըստ Գ. Չուգասզյանի՝ այս 90 տարիների ընթացքում Երևանը քաղաքական 5 փուլ է անցել: Վերջինը ներկայիս փուլն է, երբ քաղաքը դիտվում է որպես նյութական արժեքներ կորզելու գործիք. դրա մասին են վկայում բոլոր այն շենքերը, որոնք կառուցվում են բակերում, և այն անմիտ նախագծերը, որոնց ականատեսն ենք. «Այս անմարդկային միջավայրում մարդիկ չեն ցանկանում ապրել և հեռանում են անվերադարձ»։
«Գերիշխող օլիգարխիկ ցինիկ մշակույթը գիտի ամեն ինչի արժեքը, սակայն միայն ոչինչն է ճանաչում որպես արժեք: Դրան հակառակ՝ ձևավորվում է մի նոր մշակույթ, որը հասկանում է քաղաքային միջավայրի արժեքը: Այս վստահության հիման վրա է ստեղծվում մշակույթը»,- փաստեց Չուգասզյանը:
Անդրադառնալով առաջիկա ընտրություններին՝ նա նշեց, որ սրանք ընտրություններ համարել չի կարելի. «Կազինոյում հնարավոր չէ հաղթել կազինոյին: Սրանք կեղծ ընտրություններ են, պետք է փորձել ստեղծել այլընտրանք, որից էլ կծնվեն իսկական քաղաքացիական ընտրությունները»:
Վերջում բանախոսը հավելեց, որ ճիշտ ընդդիմությունը աթոռի 4 ոտքերից մեկն է, բայց եթե այդ ընդդիմությունը դադարում է սնուցել գործող համակարգը, աթոռը սկսում է ճոճվել։ «Կգա ժամանակ, երբ ժողովրդի մեծամասնությունը կհասկանա, որ կա այլընտրանք։ Մենք դեմ չենք ընտրություններին, պարզապես նման խաղատանը հրաժարվում ենք խաղալ»,- ամփոփեց Գ. Չուգասզյանը:
