ԱՄՆ-ը նոր պատժամիջոցներ չի կիրառի այն երկրների դեմ, որոնք զգալիորեն նվազեցրել են նավթի գնումն Իրանից: Այս մասին հաղորդում է Reuters գործակալությունը` հղում կատարելով ԱՄՆ պետքարտուղարությանը: Ցուցակի մեջ են Ճապոնիան և եվրոպական ևս 10 երկրներ: Այդ երկրների ֆինանսական հաստատությունները չպետք է վախենան նոր պատժամիջոցներից:
Պատժամիջոցներից խուսափած երկրների ցանկում չկան Չինաստանն ու Հնդկաստանը, որոնք համարվում են իրանական նավթի ամենամեծ ներկրողները: Ցուցակում չեն նաև ԱՄՆ դաշնակիցներ Թուրքիան և Հարավային Կորեան, որոնք սերտորեն համագործակցում են Իրանի հետ այս ոլորտում:
Հիշեցնենք նաև, որ վերջերս ԱՄՆ-ը խստացրել է պատժամիջոցները Իրանից նավթ ներկրող կազմակերպությունների նկատմամբ: Այս քայլով ԱՄՆ-ը փորձում է նվազեցնել արտարժույթի ներհոսքը իրանական տնտեսություն, ինչի արդյունքում իրանական կառավարությունը կհամաձայնի բանակցություններ սկսել միջուկային ծրագրի շուրջ:
