Հանրային հեռուստաընկերության խորհրդի նախագահ Ալեքսան Հարությունյանը, խոսելով 2011թ. եթերաշրջանի մասին, ասաց, որ սպասվում են նոր գեղարվեստական և փաստավավերագրական ֆիլմեր. «Մենք սկսում ենք նոր ֆիլմերի նկարահանումներ և էկրանավորում»։
Խորհրդի նախագահը, խոսելով 2010թ. դեկտեմբերի 31-ի երեկոյան ցուցադրված գովազդային հոլովակների մասին, ասաց, որ իրենք գովազդներ չեն պատրաստում. «Ասեմ, որ դեկտեմբերի 31-ի երեկոյան ժամը 9-ից մինչև գիշերվա ժամը 2-ը ընդամենը 4 գովազդային բլոկ է եղել` 3-4 րոպե տևողությամբ։ Մենք որոշել էինք սկսած «Աննա» սերիալից հնարավորին չափ քիչ գովազդ տեղադրել, որպեսզի գոնե նոր տարվա օրերին հեռուստադիտողը մի փոքր հանգստանա»։
Հանրայինի հեռուստադիտողին նոր սերիալներ են սպասվում, արդեն եթերում է նոր «Հրեշտակների դպրոց» սերիալը. «Մեր եթերի 60-70 տոկոս հեռուստալսարան ապահովում են այդ սերիալները, ճիշտ է, «Աննա-3» չի սպասվում, սակայն նոր անակնկալներ կլինեն։ Կարծում եմ, որ մեր սերիալներում դաստիարակչական չափորոշիչները չեն խախտվում»։ Հարությունյանն ավելացրեց, որ եթե իր երեխաները ցանկություն հայտնեն դիտել այդ սերիալները, նա չի մերժի. «Եթե իմ երեխաները ուզենան դիտել, ես չեմ արգելի, մեր սերիալները կյանքի մասին են, և այն գործողությունները, որոնք կատարվում են` կյանքից են, և մենք չենք կարող ցուցադրել միայն վալս պարող և երկինք նայող զույգի: Մենք կարող ենք բոլոր բաց տեսարանները փակել և դառնալ մեր տարածարջանի այն մուսուլմանական երկրների նման, որտեղ ամեն ինչ լավ է: Իսկ հեռուստադիտողներին սպասվում են նաև այլ ֆիլմեր. Պերճ Պռոշյանի «Հացի խնդիրը», շարունակվում են նաև Խաչատուր Աբովյանի ֆիլմի սցենարական աշխատանքները»։
Ալեքսան Հարությունյանը խոստացավ, որ մարտ ամսվա սկզբից «Հայլուր»-ը նոր տեսքով եթեր դուրս կգա. «Լրատվական-քաղաքական բլոկում ամբողջովին թարմացում է սպասվում. «Հայլուր»-ը փոփոխված կլինի` թե՛ բովանդակային առումով, թե՛ արտաքին, և դա կապված չէ նախընտրական շրջանի հետ»։
Խորհրդի նախագահն, անդրադառնալով մեծահասակների Եվրատեսիլի երգի ընտրությանը, ասաց, որ երգերի ժամկետը մի փոքր կերկարացնեն. «Արդեն կան շատ երգեր` մոտ 20-30, բայց այս պահին, որ ասեմ կան երգեր, որոնք, մենք կարծում ենք, որ կարելի է ներկայացնել հանդիսատեսի դատին, որպեսզի նա ընտրություն կատարի, դեռ ամբողջությամբ`ոչ։ Ժամկետը երկարացնելու խնդիրն այն է, որ մի շարք շատ հայտնի հայ կոմպոզիտորներ դեռ չեն ներկայացրել իրենց ստեղծագործությունները»։