Եվրամիության անդամ երկրների հանդիպմանը կընդլայնվեն Սիրիայի դեմ պատժամիջոցները, մասնավորապես՝ փաստաթղթում կներառվի երկրի առաջին տիկին, 36-ամյա Ասմա Ալ-Ասադի անունը: Այս մասին գրում է բրիտանական The Daily Telegraph-ը՝ վկայակոչելով իր դիվանագիտական աղբյուրներին:
«Ասադի ընտանիքի որոշ անդամներ կավելացվեն ցուցակում»,- հայտնել է աղբյուրը պարբերականին:
Ակնկալվում է, որ ցուցակում հայտնված ֆիզիկական անձանց եվրոպական հաշիվները կսառեցվեն, և կարգելվի նրանց մուտքը Եվրամիության տարածք:
Պարբերականը գրում է, որ այդ պատժամիջոցները, սակայն, չեն արգելի Սիրիայի առաջին տիկնոջը այցելել Մեծ Բրիտանիա, քանի որ նա ծնվել է Լոնդոնում և ունի այդ երկրի քաղաքացիություն:
Ասման ծնվել է սիրիացի ներգաղթյալների ընտանիքում: Նա ավարտել է Լոնդոնի օրիորդաց դպրոցը, այնուհետև Լոնդոնի համալսարանի թագավորական քոլեջի համակարգչային տեխնոլոգիաների և ֆրանսիական գրականության բաժինները: Համալսարանն ավարտելուց հետո աշխատել է Deutsche Bank-ում, իսկ 1998 թ. եղել է J. P. Morgan-ի աշխատակիցը: Ասադի հետ սիրավեպ սկսելուց հետո նա ավարտել է կարիերան և եկել Սիրիա: 2000 թ. դեկտեմբերին նա ամուսնացել է Սիրայի նախագահի հետ: Այժմ նրանք ունեն երեք երեխա:
Պարբերականը նշում է, որ Ասմա Ալ-Ասադին պատժամիջոցների ցուցակում ներառելիս, ամենայն հավանականությամբ, ԵՄ-ն առաջնորդվել է վերջերս Guardian-ի հրապարակած նյութերով, որոնք, ըստ թերթի, Ասադ ամուսինների էլեկտրոնային նամակներն են: Դրանցում մասնավորապես նշվում էր, որ Ասման հորինված անունով թանկարժեք գնումներ է կատարում Եվրոպայում:
