Ստամբուլում հաջորդ շաբաթ Իրանի և «վեցյակի» երկրների միջև անցկացվելիք բանակցություններում Թուրքիան հանդես է գալու պարզապես ընդունող երկրի դերում, ասել է ԵՄ արտաքին գերատեսչության ղեկավար Քեթրին Էշթոնը: Այս մասին հաղորդում է Xinhua գործակալությունը:
«Առաջին լրատվականը» տեղեկացրել էր, որ Եվրամիության արտաքին գործերի և անվտանգության քաղաքականության հարցերով գերագույն ներկայացուցիչ Քեթրին Էշթոնը հինգշաբթի օրն այցելել է Թուրքիա: Թուրք պաշտոնակցի հետ հանդիպումից հետո Էշթոնն այսպիսի հայտարարությամբ էր հանդես եկել` դրանով «խնդրելով» Թուրքիային չմիջամտել այս գործընթացին: «Իրանի հետ բանակցությունները սկսել են 5+1 ձևաչափով` Անվտանգության խորհրդի 5 մշտական անդամները ու Գերմանիան, և շարունակվելու են նույն կազմով»,- ասել է Էշթոնը:
Դավութօղլուն իր հերթին նշել է. «Որպես բանակցությունները ընդունող երկիր` մենք մթնոլորտ պիտի ապահովենք բոլոր կողմերի համար` ծավալելու ազատ քննարկում: Իսկ բանակցություններն ընթանալու են Իրանի և «վեցյակի» միջև»:
Ասուլիսի ժամանակ կողմերը հրաժարվել են ասել` ինչ է քննարկվելու հանդիպման ժամանակ, ինչ արդյունք ակնկալել, նույնիսկ չեն ասել բանակցող կողմերի հանդիպման վայրը: