Այսօր Ազգային ժողովի նիստում Ֆինանսների փոխնախարար Վարդան Արամյանը ներկայացրեց 2012 թ. փետրվարի 15-ին ստորագրված` Հայաստանի Հանրապետության և Միջազգային զարգացման ընկերակցության միջև «Զարգացման քաղաքականության երրորդ ծրագրի» ֆինանսավորման համաձայնագիրը, որով մոտ 50 մլն ԱՄՆ դոլարի վարկ է հատկացվում: Վ.Արամյանը նշեց, որ վարկի նպատակն է աղքատության կայուն կրճատումը: Վարկը տրվում է 5 տարի արտոնյալ ժամկետով, պետք է մարվի 25 տարում, 1.25% տոկոսադրույքով: Փոխնախարարը հայտնեց, որ միջոցները հատկացվում են ոչ թե տրանշով, այլ միանգամից և համալրելու են բյուջետային միջոցները:
Վ.Արամյանի խոսքով, զարգացման քաղաքականության ծրագիրը հիմնականում միտված է, որպեսզի ապահովի աճ. «Տնտեսական աճը լավագույն միջոցն է աղքատության կրճատման համար»:
«Ժառանգություն» խմբակցության քարտուղար Լարիսա Ալավերդյանը հայտարարեց, որ չկա որևէ կորելացիա ստացված գումարների և աղքատության կրճատման միջև. «Մեզ նման երկրներում, երբ կես միլիարդ դոլար է բերվում աղքատության հաղթահարման համար, որպես կանոն, այն 4% կրճատվում է: Մեզ մոտ՝ ոչ: Նույնիսկ 1.5 մլրդ դրամաշնորհ ստանալուց հետո աղքատոթյունը խորացել է»:
ԱԺ ֆինանսավարկային և բյուջետային հանձնաժողովի նախագահ Գագիկ Մինասյանի խոսքով, ճգնաժամի հետևանքով աղքատությունը խորացել է ոչ միայն Հայաստանում: «Անկախ նրանից, թե ինչպիսի անուն կտանք, այսօր առկա է աղքատության բավականին անթույլատրելի մակարդակ, և այս միջոցները պետք է ուղղվեն դրա նվազեցմանը: Ամենալավ տարբեակը փողերը բաժանելը չի: Պետք է հաղթահարենք ոչ թե աղքատությունը, այլ վերացնենք դա ծնող պատճառները»:
