Սխալ է այն տեսակետը, որ «Արտակարգ ռեժիմի դրության մասին» օրենքով բանակն օգտագործվելու է իշխանության պահպանման համար: Այսօր ԱԺ-ում տեղի ունեցած լսումների ժամանակ այս մասին ասաց ՀՀԿ ոխնախագահ Գալուստ Սահակյանը:
«Մենք հարգում ենք մեր ընդդիմախոսների կարծիքները, բայց արտահայտում ենք նաև մերը: Փոխանակ մշակելու նախընտրական իրենց ռազմավարությունը՝ ընդդիմությունը կոալիցիոն ուժերի, մասնավորապես ՀՀԿ-ի դեմ պայքար է սկսել: Մենք պոպուլիստական կուսակցություն չենք, այլ գործի մարդ ենք:
Վերջին պահին ընդդիմության արած հայտարարություններ նրա օգտին չեն: Ուզում եմ ասել, որ բանակը երբեք ու երբեք կապ չունի քաղաքականության հետ: Օրենքը պատրաստ է ընդունման և կոալիցիոն ուժերը գնացել են այդ ճանապարհով, դրա համար էլ ողջ պատասխանատվությունն ընկնում է իշխանության ուսերին: Այնպես որ, թեմայի շուրջ ընդդիմության սրտաճմլիկ խոսքերը տեղին չեն: Մենք միշտ էլ պետք է պատրաստ լինենք, որպեսզի որոշ ուժեր հնարավորություն չունենան ձեռք բարձրացնել ժողովրդի վրա: Մենք այս հարցն ենք լուծում: ԱԺ-ն այն ամբիոնը չէ, որ կարողանանք այստեղից բանակը հայ մարդու աչքին «բոբո» դարձնել:
Ունենք ճանապարհ, եկեք այդ ճանապարհը միասին անցնենք: Մի մտածեք, որ Հայաստանում կծնվի մի քաղաքական ուժ, որը կստիպի բանակին՝ ձեռք բարձրացնել ժողովրդի վրա: Մենք ասում ենք՝ մի փոքր հավատանք, ոչ թե ՀՀԿ-ին այլ մեր պետությանը, ինքներս մեզ»,- ասաց նա: :
