2002 թվականից ի վեր Ադրբեջանը զենքի ներկրման ծավալներն ավելացրել է 164 տոկոսով, աշխարհի ավելի քան 100 պետությունների թվում զբաղեցնելով 38-րդ հորիզոնականը` գնված սպառազինությունների ծավալով: Սա են վկայում Ստոկհոլմում գործող Խաղաղության ուսումնասիրության միջազգային ինստիտուտի` SIPRI-ի այսօր հրապարակած զեկույցի տվյալները, հայտնում է Ազատություն ռադիոկայանը:
Ռազմական խնդիրներով` մասնավորաբար, սպառազինությունների գնումների դիտարկմամբ զբաղվող այս հեղինակավոր վերլուծական կառույցը փաստաթղթում նշում է, որ Ադրբեջանը սպառազինության լայնածավալ գնումներն իրականացնում է Հայաստանի հետ Լեռնային Ղարաբաղի շուրջ ծագած վեճի պատճառով:
«Թեեւ Հայաստանի իշխանությունները հայտարարում են, որ ի պատասխան Ադրբեջանի կողմից կատարվող գնումների` իրենք եւս նմանատիպ գնումներ կիրականացնեն, այնուհանդերձ, վերջին 10 տարիներին ներկրված սպառազինությունների քանակով Հայաստանը հետընթաց է արձանագրել», – ասված է զեկույցում։ Ներկրված զենքի եւ զինամթերքի ծավալներով 2002 – 2006 թթ. Հայաստանը 71-րդ տեղում էր, այժմ, ըստ շվեդական հետազոտական կենտրոնի տվյալների, հայտնվել է 84-րդ տեղում:
Ինչ վերաբերում է արտերկրից ներկվող սպառազինության ծագմանը, ապա այստեղ Խաղաղության ուսումնասիրության միջազգային ինստիտուտի աշխատակիցները պնդում են, որ պաշտոնական Բաքվին եւ Երեւանին զենք ու զինամթերք վաճառող թիվ մեկ պետությունը Ռուսաստանի Դաշնությունն է:
«2007 – 2011 թվականներին Ադրբեջանին մատակարարված զենքի 55 տոկոսը ռուսական արտադրության է եղել: Հայաստանի պարագայում ռուսական զենքի համամասնությունն ավելի մեծ է: Երեւանի կողմից վերջին 4 տարիներին ձեռք բերված զենքի ու զինամթերքի 96 տոկոսը ռուսաստանյան ծագում ունի», – նշում են Խաղաղության ուսումնասիրության միջազգային ինստիտուտի փորձագետները:
