Ֆլորիդայում դեռատի սերֆինգիստուհուն, որին շնաձուկը երկու անգամ ջուրն է քաշել, փրկել է մայրը` նրան բառացիորեն դուրս քաշելով շնաձկան երախից: Այս մասին հայտնել է ABC-ն:
Վալեյ Լևին և նրա 15-ամյա դուստրը` Սիդնին, սերֆինգով են զբաղվել Նյու Սմիրնա Բիչում, երբ անսպասելիորեն հայտնված շնաձուկը քաշել է Սիդնին ջրի տակ:
Սակայն մի քանի վայրկյան անց աղջիկը դուրս է եկել ու բարձրացել սերֆինգի վրա. նրա կոճն ամբողջությամբ արնոտված է եղել: Հանկարծ շնաձուկը նորից աղջկան քաշել է ջրի տակ:
«Ինձ համար դա կարծես «Ծնոտներ»-ից տեսարան լիներ, և ես ասացի ինձ` թույլ չեմ տա իմ դստերը մահանալ: Ես բռնեցի նրա ուսերից ու քաշեցի իմ տախտակի վրա»,- պատմել է կինը WKMG-TV հեռուստաալիքին: Ընդ որում` կինը հաջողացրել է ոտքով հարվածել շնաձկան երախին:
Սակայն շնաձուկը շարունակել է պտտվել նրանց շուրջը, մինչև բղավոցները լսելով՝ օգնության են հասել մյուս սերֆինգիստները: Հենց նրանք էլ օգնել են մորն ու աղջկան ափ ելնել, որտեղից աղջկան տարել է շտապօգնության ավտոմեքենան:
