Մոտ 25 հազար մարդ էր երեկ հավաքվել գերմանական Բոխում քաղաքում` բողոքելով Թուրքիայի վարչապետ Ռեջեփ Թայիփ Էրդողանի վարած քաղաքականության դեմ: Հավաքվածների մեջ հիմնականում եղել են հայեր, քրդեր, ալավիներ: Այս մասին հաղորդում է Euronews-ը:
Մենք հաղորդել էինք, որ վերջին պահին Էրդողանը հետաձգել էր այցը Գերմանիա, որտեղ պետք է մասնակցեր «Շտայգեր» մրցանակաբաշխությանը, որը շնորհվում է աշխարհում մարդկայնությունը և հանդուրժողականությունը խրախուսելու համար: Որպես այցի հետաձգման պատճառ նշվել էր Աֆղանստանում ուղղաթիռի կործանումը, որի հետևանքով զոհվել էին թուրք զինվորականներ:
Այցի հետաձգումը, սակայն, չի ազդել ցույցի մասնակիցների որոշման վրա, և նրանք անցկացրել են բողոքի ակցիա:
«Այստեղ` Գերմանիայում, մենք օտարերկրացիներ ենք, սակայն մենք օտարերկրացիներ ենք նաև Թուրքիայում: Մենք` քրդերս և ալավիներս, չգիտենք ուր գնալ»,- ասել է ցույցի մասնակիցներից մեկը:
Մասնակիցները բողոքել են նաև այս մրցանակաբաշխության դեմ` մրցանակը Էրդողանին շնորհելը անվանելով «հարված Թուրքիայի ազգային փոքրամասնություններին»:
