Ոստիկանության քննչական գլխավոր վարչության Երևանի քննչական վարչության ճանապարհատրանսպորտային հանցագործությունների քննության բաժնում ավագ քննիչ Մանվել Մուրադյանի կողմից նյութեր են նախապատրաստվում մարտի 17-ին Երևանում տեղի ունեցած վթարի փաստով:
Ֆոտոլրագրող Գագիկ Շամշյանը Aravot.am-ին հայտնել է, որ այդ օրը ժամը 00.30-ին Երևանի Զաքյան 5 շենքի բնակիչ 25-ամյա Հայկ Ղարագոզյանը վարելով «Տոյոտա-Պրադո» մակնիշի 07 ՈՈ 007 համարանիշի ավտոմեքենան Տերյան-Իսահակյան փողոցների խաչմերուկում բախվել է «Ալբերտ Առաքելյան ԱՁ Գիգա» տաքսի ծառայությանը պատկանող «Պեժո 206» մակնիշի Լ3069 համարանիշի ավտոմեքենային: Պեժոյի վարորդը եղել է 47-ամյա Նորիկ Սողոմոնյանը:
Վթարի հետևանքով Պեժոյի ուղևոր, 22-ամյա Սրբուհի Ազիզյանը բուժօգնություն ստանալու նպատակով դիմել է Երևանի թիվ 2 բուժմիավորում: Գ. Շամշյանը հայտնում է, որ «Տոյոտա-Պրադոյի» վարորդ Գ. Ղարագոզյանը աշխատում է ՀՀ Պետական եկամուտների կոմիտեի Էրեբունու հարկային տեսչությունում որպես հարկային տեսուչ: Իսկ նրա հայրը ԱԺ պատգամավոր, ԲՀԿ-ական Հարություն Ղարագյոզյանն է` Կարամելի Հարութը: Ֆոտոլրագրողի տեղեկություններով, նախապատրաստված նյութերը հավանաբար կուղարկվեն Հայաստանի հատուկ քննչական ծառայություն:
