«Մեզնից յուրաքանչյուրը մտածե՞լ է, թե ինչպիսի երկիր է ինքը ուզում ստեղծել»,- այսօր թբիլիսյան կուսակցությունների կոնֆերանսի ժամանակ հայտարարել է Վրաստանի «Ազատ դեմոկրատներ» կուսակցության առաջնորդ Իրակլի Ալասանիան:
«Մենք առաջին հերթին ցանկանում ենք ունենալ ազատ մարդկանց երկիր, որովհետև առանց ազատության չենք կարող կառուցել պետություն: Բացի այդ, վախեցած մարդիկ ոչ մի բարի բան չեն կարող անել: Մենք խոսում ենք աշխատատեղերի ստեղծման, լավ կրթական և զարգացած առողջապահական համակարգի մասին, բայց երկրի գլխավոր խնդիրն այն է, որ բացակայում է ազատությունը:
Վրաստանում մենիշխանություն է, այդ պատճառով էլ քաղաքականությունը փակուղու մեջ է հայտնվել»,- հայտարարել է Իրակլի Ալասանիան:
Ինչպես նշել է «Ազատ դեմոկրատների» առաջնորդը` նախագահ Միխեիլ Սաակաշվիլին երկիրը տանում է ավտորիտարիզմի և տոտալիտարիզմի ուղիով:
«Եթե մենք ինքնասիրություն և պատիվ ունենք, ապա դրա հետ չպետք է համակերպվենք»,- նշել է նա:
Ալասանիան անդրադարձել է նաև Բիձինա Իվանիշվիլիի՝ քաղաքականություն մուտք գործելու հարցին:
«Բիձինա Իվանիշվիլիի քաղաքականություն մտնելով՝ հոկտեմբերյան ընտրություններից հետո ներկայիս իշխանությունը աղբանոցում կհայտնվի»,- ասել է Ալասանիան:
