Այսօր լրագրողների հետ հանդիպման ժամանակ նախկին վարչապետ Հրանտ Բագրատյանը, անդրադառնալով ձվի շուկայում անցած տարի ստեղծված իրավիճակին, նշեց, որ, իր կարծիքով, փորձ է արվում այս ոլորտը ևս մենաշնորհացնել: Այսպես, ըստ նախկին վարչապետի` նախ ամռանը իջեցվեց ձվի գինը, որպեսզի ձու արտադրողներից մեկը գնի մյուսներին, որոնք գնի իջեցումից կորուստներ կունենային: «Ես ենթադրում եմ, որ ուզում էին տալ մեկին՝ Ջրառատի թռչնաֆաբրիկայի տնօրենին»,- ասաց Հ. Բագրատյանը` հավելելով սակայն, որ ինչ-ինչ պատճառներով սա չի ստացվել, հնարավոր է, որ Ջրառատի թռչնաֆաբրիկայի տնօրենը հրաժարվել է: Այս պահի դրությամբ, ըստ Բագրատյանի, իշխանությունենրը դեռ չեն հրաժարվել այս շուկան մոնոպոլացնելու իրենց մտադրությունից: Սակայն այդ օլիգարխների բախման պատճառով ձու արտադրող մանր գյուղացիական տնտեսությունները, որոնք արտադրում էին ՀՀ-ում ողջ տարեկան ձվի քանակի (500-550 մլն հատ) մինչև 20%-ը (100-130 մլն հատ), դադարեցնում են իրենց արտադրությունը և հանրապետությունում դեկտեմբերին ձվի առաջարկի կտրուկ նվազում է դիտվում, ինչն էլ տանում է գների կտրուկ աճի: ԱՎԾ այն տվյալը, թե 2010-ին ՀՀ-ում 700 մլն հատ ձու է արտադրվել, Հ. Բագրատյանը «խայտառակ սուտ» համարեց: «Հայաստանի վիճվարչությունը նաև ասաց, որ մշտական բնակչությունը պակասել է 100 հազարով: Ես ԱՎԾ ղեկավարին ու վարչապետին հրավիրում եմ ինձ մոտ միկրոէկոնոմիկայի դասախոսության` այս թվերն ունենալով ինչ կնշանակի կորը: Երբ որ բնակչության թիվը պակասում է, ձվի արտադրությունն էլ 500 մլն-ից դառնում է 700 մլն, ձվի իրական գինը չի կարող թանկանալ տարեկան միջինը 40%-ով, դա բացառվում է: Չի կարող արտադրությունն ավելանալ, սպառողների քանակը պակասել, ու ստացվել, որ մեզնից յուրաքանչյուրը ամեն օր ուտում է 3 հատ ձու: Վերջապես, ձուն ոչ էլաստիկ արտադրանք է, օրինակ` չգիտեմ, վարչապետը գիտի՞՝ ինչ բան է ոչ էլաստիկ արտադրանքը: Ես ուսանողներին բացատրում եմ, թե ինչ բան է: Կարող եմ Ստեփան Մնացականյանին էլ հանդուրժել լսարանում, որպեսզի նման փչոց մեզ չմատակարարեն»,- ասաց Հ. Բագրատյանը` «սուտ» որակելով իշխանության ներկայացուցիչների այն հայտարարությունները, թե 2010-ին սկսել ենք համեմատաբար ավելի շատ ձու սպառել: «Էս կառավարությունում, ինչ Տիգրան Սարգսյանը մտել է այդտեղ, հնարավոր չէ մի էջ վերլուծական, մաթեմատիկական աղյուսակներով նյութ հայտնաբերել, դա հակացուցված է իրենց ինտելեկտին»,- ամփոփեց Հ. Բագրատյանը: