«Օրինաց երկիր» կուսակցության մամլո քարտուղար Սուսաննա Աբրահամյանը «Առաջին լրատվական»-ի հետ զրույցում հերքեց լրատվամիջոցներում տարածված այն տեղեկությունը, որ ինքն ու ՕԵԿ խմբակցության ղեկավար Հեղինե Բիշարյանը համամասնական ցուցակի՝ կանանց համար նախատեսված երկրորդ տեղի հետ կապված տարաձայնություններ ունեն:
«Այդ լուրերը բացարձակապես սուտ են ու կեղծիք: Իմ ու Հեղինե Բիշարյանի հարաբերությունները միշտ լավ, դրական մակարդակի վրա են եղել և այսօր էլ շարունակում այդպիսին մնալ: Լուրը, որ Բիշարյանն ուզում է՝ ՕԵԿ ցուցակի երկրորդ կինը դառնա իր ուսուցչուհի ընկերուհին, որի հետ, իբր, ժամանակին աշխատել է Երևանի թիվ 191 դպրոցում, իրականությանը չի համապատասխանում: Այդ ընկերուհի կոչվածը իրականում չկա»,- ասաց Սուսաննա Աբրահամյանը:
Հարցին՝ ինքն, այնուամենայնիվ, լինելո՞ւ է ՕԵԿ համամասնական ցուցակում, կուսակցության մամլո քարտուղարը նշեց. «Մեր ցուցակը պատրաստ կլինի առաջիկայում, այդ ժամանակ էլ կիմանաք»:
Նշենք, որ ըստ «Երկիր» թերթի՝ ՕԵԿ-ում ցուցակի հետ կապված տարաձայնությունները շարունակվում են: «Մեր տեղեկություններով՝ այս անգամ էլ վեճ է ընկել կանանց մեջ: Ինչպես արդեն հայտնի է, ցուցակի առաջին կինը լինելու է Հեղինե Բիշարյանը. տարաձայնությունը երկրորդ տեղի հետ է կապված, որի համար պայքարում է ՕԵԿ մամլո խոսնակ Սուսաննա Աբրահամյանը: Վեճը հասել է այնտեղ, որ երբեմնի մտերիմներ Հեղինե Բիշարյանն ու Սուսաննա Աբրահամյանը միմյանց հազիվ են բարևում, իսկ Բիշարյանը ՕԵԿ-ի մամլո խոսնակին առաջվա նման չի գովում: Ըստ թերթի տեղեկությունների` Հեղինե Բիշարյանը ցանկանում է, որ ՕԵԿ ցուցակի երկրորդ կինը դառնա իր ուսուցչուհի ընկերուհին, որի հետ ժամանակին աշխատել է Երևանի թիվ 191 դպրոցում»: