ԱՄՆ Վաշինգտոն նահանգում ձերբակալել են դպրոցում ատրճանակից կրակած իննամյա երեխայի մորը:
Ինչպես հաղորդում է Seattle Post Intelligencer օնլայն պարբերականը, Ջեմի Լի Չաֆինը ձերբակալվել է մարտի 15-ին կայացած դատական լսումներից հետո: Դատարանի դահլիճից նրան դուրս են տարել ձեռնաշղթաներով: Կնոջը կարող են ազատ արձակել 50 հազար դոլար գրավի դիմաց:
Չաֆինին մեղադրանք է ներկայացվել անօրինական զենք պահելու և հարձակման համար, սակայն նա իրեն մեղավոր չի ճանաչում: Կնոջը սպասվում է 5 տարվա ազատազրկում:
Չաֆինի կողակցին՝ Դուգլաս Բաուերին, նույնպես մեղադրանք է ներկայացվել նույն հոդվածով: Սակայն նրան չեն ձերբակալել, քանի որ ի տարբերություն Չաֆինի, նա նախկինում խնդիրներ չի ունեցել օրենքի հետ: Բացի այդ, Չաֆինը կասկածվում է գողության մեջ:
Մեղադրող կողմը պնդում է, որ երեխան ատրճանակը վերցրել է մեղադրյալների «ծայրահեղ անտարբերության» պատճառով:
Չաֆինի իննամյա որդին, որի անունը չի հաղորդվում, փետրվարի 22-ին դպրոց էր գնացել ատրճանակը պայուսակի մեջ դրած: Երբ նա պայուսակը սեղանին էր դրել, ատրճանակը կրակել էր, ինչի հետևանքով վիրավորվել էր ութամյա մի աղջիկ, որը մինչ այժմ գտնվում է հիվանդանոցում: Հետաքննության տվյալներով՝ երեխան ատրճանակը վերցրել էր Բաուերի մեքենայի միջից: