Հինգշաբթի Եվրախորհրդարանը որոշում է կայացրել, ըստ որի` ՌԴ-ում տեղի ունեցած նախագահական ընտրությունները «չեն հանդիսանում ո’չ օբյեկտիվ, ո’չ կոռեկտ»: Այդ մասին Interfax-ին հայտնել է Եվրամիությունում Ռուսաստանի մշտական ներկայացուցիչ Վլադիմիր Չիժովը:
«Այդուհանդերձ, մենք ծանր չենք տանում այս բանաձևը: Եվրախորհրդարանի՝ Ռուսաստանի նախագահական ընտրությունների նախօրեին կայացրած որոշումը չէր կարող ազդել այդ ընտրությունների վերջնական արդյունքի վրա, ինչպես և՝ ներկայիս բանաձևը: Այն պարզապես հերթական բանաձևն է»,- հայտարարել է դիվանագետը:
Հիշեցնենք, որ մարտի 15-ին Եվրախորհրդարանը կայացրել էր բանաձև` մատնանշելով ընտրությունների «թերություններն ու խախտումները», որոնք տեղ են գտել ՌԴ-ում մարտի 4-ի ընտրություններին նախապատրաստվելու ընթացքում:
Փաստաթղթի հեղինակները կարծում են, որ ռուս ընտրողներին տրվել է ընտրության սահմանափակ հնարավորություն, քանի որ Կենտրոնական ընտրական հանձնաժողովը (ԿԸՀ) հրաժարվել է ընդունել «Յաբլոկո» շարժման առաջնորդ Գրիգորի Յավլինսկու թեկնածության գրանցումը նախագահական ընտրություններում՝ հայտարարելով, թե գրանցման փաստաթղթերում անճշտություններ կան։
ՌԴ ԿԸՀ-ն մերժել էր Յավլինսկուն` չեղյալ համարելով նրա օգտին հավաքված ստորագրված փաստաթղթերի 25 տոկոսը։
Գերագույն դատարանը ԿԸՀ-ի որոշումն օրինական էր համարել:
Եվրախորհրդարանը ռուսական իշխանություններին կոչ էր արել հետամուտ լինել ընտրությունների ընթացքում տեղ գտած թերություններին, որոնք մատնանշել էին դիտորդները:
