ՀՀ պաշտպանության նախարարության լրատվական ծառայությունից «Առաջին լրատվական»-ին տեղեկացնում են, որ ՊՆ Սեյրան Օհանյանը մարտի 15-ին ընդունել է մարտի 12-ից 16-ին Հայաստանում գտնվող ԱՄՆ և Միացյալ Թագավորության փորձագիտական խմբին, որը Հայաստանում է ՀՀ զինված ուժերի կադրային կառավարման վերաբերյալ խորհրդատվության նպատակով:
Հանդիպմանը ներկա, ՀՀ-ում Միացյալ Թագավորության արտակարգ և լիազոր դեսպան Քաթերին Լիչը և ՀՀ-ում ԱՄՆ դեսպանության ղեկավարի տեղակալ Բրյուս Դոնահյուն հաստատել են իրենց երկրների պատրաստակամությունը ՀՀ զինված ուժերում իրականացվող բարեփոխումներին աջակցելու գործում:
Այնուհետև փորձագիտական խումբը ՀՀ պաշտպանության նախարարին հանգամանալից ներկայացրել է ՀՀ ՊՆ աշխատանքային խմբի հետ համատեղ կատարված աշխատանքները, ինչպես նաև առաջարկներ ու նկատառումներ ներկայացրել ՀՀ զինված ուժերում ընթացող արհեստավարժ ենթասպայական համակարգի հետագա զարգացման գործընթացի վերաբերյալ:
