Ադրբեջանական Turan լրատվական գործակալության փոխանցմամբ՝ Ադրբեջանի Տնտեսական հետազոտությունների կենտրոնի ղեկավար Գուբադ Իբադօղլուն ողջունել է ԽՍՀՄ-ի խնայբանկերում ներդրված ավանդները բնակչությանը վերադարձնելու մասին որոշումը:
Չնայած դրան՝ Իբադօղլուն ընդգծել է, որ կառավարությունը եռակի անգամ պակաս գումար է վերադարձնելու քաղաքացիներին, քան նրանք ունեին խնայբանկերում. «Խնայբանկում ունեցող 2000 խորհրդային ռուբլու դիմաց վերադարձվելու է ընդամենը 300 մանաթ (1 դոլարը հավասար է 0.78 մանաթի), իսկ 10,000 ռուբլու փոխարեն՝ 1000 մանաթ:
Հաշվի առնելով այն, որ ավանդների մեծամասնությունը բաժին է ընկնում 1970-ական թվականներին, ակնհայտ է դառնում այդ գումարների գնողունակության անհամաչափությունը: Եթե այն ժամանակ 10,000 ռուբլիով կարելի էր գնել «ԳԱԶ-24» կամ «Ժիգուլի» տիպի ավտոմեքենա, ապա ներկայումս 1000 մանաթով հնարավոր չէ գնել անգամ հին ավտոմեքենա:
Հաշվի առնելով այն, որ ավանդ կատարած Ադրբեջանի քաղաքացիների 70 տոկոսը խնայբանկերում ունեցել են մինչև 2000 ռուբլի, 20 տոկոսը՝ մինչև 10,000 ռուբլի և 10 տոկոսը՝ ավելի քան 10,000 ռուբլի՝ բնակչությանը վերադարձվելիք գումարը կազմի 400-500 միլիոն մանաթ: Սակայն ավանդների վերադարձման գործընթացը տևելու է երկու տարի և չի ծանրաբեռնի պետբյուջեն, ինչպես նաև չի ազդի ինֆլյացիոն գործընթացների վրա:
Ավելի նպատակահարմար կլիներ, եթե ավանդների վերադարձումը տևեր 5 տարի և տեղի ունենար ավելի արդար ձևով: Իմ տվյալներով՝ 1992 թվականի հունվարի 1-ին Ադրբեջանի 1,986,000 քաղաքացիներ ԽՍՀՄ խնայբանկերում ունեցել է 4800 միլիոն խորհրդային ռուբլի, ինչը ներկայումս համարժեք է 1.5-1.8 միլիարդ մանաթի»:
