Բրիտանացի ֆեմինիստուհիները կոչ են արել արգելել պլաստիկ վիրահատությունների գովազդը: Մեծ Բրիտանիայի կառավարությանն ուղղված բաց նամակի տակ, որը տպագրված է The Guardian-ում, ստորագրել է 10 ակտիվիստ:
Պատճառների թվում նշվում է պլաստիկ վիրահատություններ կատարող ընկերությունների ագրեսիվ քաղաքականությունը:
Ֆեմինիստուհիների խոսքով` ընկերությունները բարձրացնում են նման ծառայությունների նկատմամբ պահանջարկը պատկերների օգտագործման շնորհիվ, ինչը խաթարում է հավատը սեփական մարմնի նկատմամբ:
Բացի դրանից` գովազդում պլաստիկ վիրահատությունը ներկայացվում է որպես բնական երևույթ, թեև իրականում այն վտանգավոր է առողջությանը՝ ինչպես ցանկացած վիրահատական միջամտություն:
Պլաստիկ վիրահատությունների գովազդը մեծ տեղ է զբաղեցնում բրիտանական կանանց ամսագրերում: UK Feminista-ի հետազոտության համաձայն` 2011թ. հունիսից Cosmopolitan ամսագրում հայտնվել է այդպիսի 32, Marie Claire-ում` 16, Elle-ում` 12, իսկ Vogue-ում `10 գովազդ:
Ներկայում Մեծ Բրիտանիայում պլաստիկ վիրահատությունների գովազդի որևէ սահմանափակում չի գործում:
