ИТАР-ТАСС-ի փոխանցմամբ՝ ԱՄՆ պետդեպարտամենտի պաշտոնական ներկայացուցիչ Վիկտորյա Նուլանդը ճեպազրույցի ժամանակ մեկնաբանել է ադրբեջանցի պաշտոնյաների այն հայտարարությունները, թե Ղարաբաղյան հակամարտությունը կարող է լուծվել ուժային ճանապարհով.
«Ղարաբաղյան հակամարտությունը չի կարող կարգավորվել ռազմական ճանապարհով: Հանդիսանալով ԵԱՀԿ Մինսկի խմբի համանախագահ՝ ԱՄՆ-ը նախկինի նման վճռականորեն է տրամադրված հակամարտող կողմերին օգնելու հարցում՝ հասնելու համար խաղաղ ճանապարհով Ղարաբաղյան հակամարտության ամուր կարգավորմանը: Այդ հակամարտությունը չունի կարգավորման ռազմական տարբերակ: ԱՄՆ-ը հակամարտող կողմերին կոչ է անում սեփական բնակչությանը պատրաստել խաղաղության և ոչ թե պատերազմի, ինչպես նաև զերծ մնալ սադրիչ հռետորիկայից կամ գործողություններից»:
Հիշեցնենք, որ Ադրբեջանի պաշտպանության նախարար Սաֆար Աբիևը հայտարարել էր, թե Ադրբեջանը «պատրաստ է» Ղարաբաղյան հակամարտության ուժային կարգավորմանը, իսկ նախագահ Իլհամ Ալիևը Ադրբեջանի թիվ մեկ թշնամի էր որակել համայն աշխարհի հայությանը:
