Հեռուստատեսությունները նախորդ ընտրություններից դասեր են քաղել: Այսօր «Առաջին լրատվական»-ի հետ զրույցում նման տեսակետ հայտնեց PR մասնագետ Կարեն Քոչարյանը`համեմատելով լրատվամիջոցների աշխատանքը 2007-2008 թվականների ընտրություններին և հիմա` չորս տարի անց:
Կ. Քոչարյանի կարծիքով` 2008 թվականից հետո լրատվամիջոցների աշխատանքում շատ բան է փոխվել: Ըստ նրա` հեռուստատեսություններում քաղաքականությունն էր տարվում շատ սխալ, շատ սխալ պրոպագանդա էր տարվում: «Այսինքն` էկրանից ցուցադրվում էր մեկ բան, իսկ իրականությունը լրիվ այլ էր: Սա բերեց նրան, որ ժողովուրդը դուրս եկավ փողոց լսելու այն իրականությունը, որն ուզում էր լսել, հիմա իհարկե անհամեմատ փոխվել է իրավիճակը: Նախ հեռուստատեսություններն այլևս այդկերպ չեն աշխատում և երկրորդ` այս տարիների ընթացքում ինտերնետ ռեսուրսներն այնքան զարգացան, որ համեմատել 2007-ի հետ չի կարելի: Եթե այսօր հնարավոր է առցանց հանրահավաքի հետևել, այն ժամանակ լրագրողները հանրահավաքից մինչև գալիս էին խմբագրություն, մինչև սղագրում էին, մինչև տեղադրում էին եղած ինտերնետ ռեսուրսներում, բավականին ժամանակ էր անցնում, իսկ այսօր ամբողջ աշխարհն է շատ ավելի արագ դարձել, մարդիկ ամեն բան ցանկանում են շատ ավելի արագ իմանալ»,- մեկնաբանեց Կ. Քոչարյանը` ընդգծելով, որ նախորդ ընտրությունների ժամանակ մարդիկ այլընտրանքային ինչ-որ բան լսելու կարիք ունեին:
Նրա համոզմամբ` հիմա այդ տեղեկատվությունը այսպես թե այնպես մարդիկ ստանում են նույնիսկ հեռուստատեսությունից, ի դեպ՝ իշխանական: Վերհիշելով` նա նշեց, որ ժամանակին ընդդիմադիր գործիչների մուտքը հեռուստատեսություն ընդհանրապես արգելված էր: «Այսօր ես չեմ պատկերացնում, թե ով կարող է ասել, որ իր մուտքը հեռուստատեսություն արգելված է: Ես կարծում եմ՝ բոլոր հեռուստատեսություններում բոլոր ուժերը ներկայացվում են: Հնարավոր է՝ մի քիչ քիչ, մի քիչ շատ, դա էլ խնդիր է արդեն, բայց դա նաև բնական է»,- եզրափակեց իր խոսքը PR մասնագետ Կարեն Քոչարյանը:
