Ռուսական Regnum լրատվական գործակալության փոխանցմամբ՝ Վրաստանի էկոնոմիկայի ու կայուն զարգացման նախարար Վերա Կոբալիան լրագրողների հետ զրույցում ներկայացրել է 2011 թվականին Վրաստանում իրականացված ներդրումների մասին տվյալներ.
«Վրաստանի Ազգային վիճակագրական ծառայության չճշգրտված տվյալներով 2011 թվականին Վրաստանում կատարված ներդրումների ծավալը կազմել է 981 միլիոն դոլար, ինչը 20 տոկոսով գերազանցում է 2010 թվականի ցուցանիշը (815 միլիոն դոլար):
Միևնույն ժամանակ, այն 583 միլիոն դոլարով զիջում է 2008 թվականի ցուցանիշին (1564 միլիոն դոլար): Կատարված ներդրումների ամենաբարձր ցուցանիշը գրանցվել է 2007 թվականին՝ 2015 միլիոն դոլար: 2006 թվականի ցուցանիշը կազմել է 1190 միլիոն դոլար:
2011 թվականին Վրաստանում ամենամեծ ներդրումներն իրականացրել է Նիդեռլանդները՝ 213.4 միլիոն դոլար (բոլոր ներդրումների 21.8 տոկոսը), ապա գալիս են Դանիան՝ 99.9 միլիոն դոլար (10.2 տոկոս), միջազգային կառույցները՝ 94.5 միլիոն դոլար (9.6 տոկոս), Կիպրոսը՝ 94.2 միլիոն դոլար (9.6 տոկոս), Թուրքիան՝ 77.4 միլիոն դոլար (7.9 տոկոս), Ռուսաստանը՝ 52.3 միլիոն դոլար (5.3 տոկոս), Ադրբեջանը՝ 44.8 միլիոն դոլար (4.6 տոկոս):
2011 թվականին կատարված ներդրումներից 180.8 միլիոն դոլարը բաժին է ընկել վերամշակման արդյունաբերությանը, 158.3 միլիոն դոլարը՝ էներգետիկայի ոլորտին, 130.9 միլիոն դոլարը՝ տրանսպորտի ու կապի ոլորտին, 122.2 միլիոն դոլարը՝ անշարժ գույքին, 37.4 միլիոն դոլարը՝ լեռնահանքային արդյունաբերությանը, 34.8 միլիոն դոլարը՝ առողջապահության ու սոցիալական ապահովման ոլորտին, 13.9 միլիոն դոլարը՝ հյուրանոցային ու ռեստորանային բիզնեսին, 13.6 միլիոն դոլարը՝ գյուղատնտեսությանն ու ձկնորսությանը»:
