Թուրքական Zaman թերթի փոխանցմամբ՝ Սիրիայի հարցում ՄԱԿ-ի և ԱՊԼ-ի հատուկ ներկայացուցիչ Քոֆի Անանից հետո՝ երեկ, անակնկալ այցով Անկարա է ժամանել ամերիկյան Կենտրոնական հետախուզական վարչության (ԿՀՎ) ղեկավար Դևիդ Պետրեուսը:
Նրան ընդունել է Թուրքիայի վարչապետ Ռեջեփ Էրդողանը: 1,5 ժամ տևած հանդիպման ժամանակ կողմերը քննարկել են Սիրիայի, Իրանի, Իրաքի, Աֆղանստանի հարցերը և ընդհանրապես տարածաշրջանային զարգացումները: Նրանք քննարկել են նաև Թուրքիայում ահաբեկչական հռչակված ու արգելված Քրդստանի աշխատավորական կուսակցության (PKK) դեմ պայքարի հարցը:
Պետրեուսի հետ հանդիպել են նաև Թուրքիայի Ազգային հետախուզական կազմակերպության (MIT) ղեկավար Հաքան Ֆիդանը և գլխավոր շտաբի ներկայացուցիչները:
Պետրեուսն արդեն լքել է Թուրքիան: Նշվում է, որ սա ԿՀՎ-ի ղեկավարի պաշտոնում Պետրեուսի երկրորդ այցն էր Թուրքիա: Նախորդ այցը տեղի է ունեցել 2011 թվականի հուլիսին:
