Աֆղանստանում ծայրահեղական «Թալիբան» շարժման անդամներն այսօր հարձակում են գործել երկրի կառավարական պատվիրակության վրա, որը Քանդահար էր ժամանել ամերիկացի զինվորի կողմից խաղաղ բնակիչների սպանության հանգամանքներին ծանոթանալու համար: Այս մասին հաղորդում է RIA Novosti-ն՝ վկայակոչելով Քանդահարի նահանգապետի մամլո քարտուղարի հայտարարությունը:
Հայտարարության մեջ ասվում է, որ դեպքը տեղի է ունեցել տեղի ժամանակով ժամը 12:00-ի սահմաններում Բոլանդի բնակավայրում, որտեղ ժամանել էին պատվիրակության անդամները և զրուցում էին զոհերի հարազատների հետ: Այդ ժամանակ զինյալները կրակել են պատվիրակության անդամների ուղղությամբ, իսկ թիկնապահները պատասխան կրակ են արձակել: Պաշտոնյաներից ոչ ոք չի տուժել, սակայն վիրավորվել է տեղի բնակիչներից մեկը:
Մամլո քարտուղարի խոսքերով՝ պատվիրակության կազմում են եղել նախագահի երկու հարազատ եղբայրները, աֆղանական բանակի գլխավոր շտաբի պետը, Ազգային անվտանգության գլխավոր վարչության և ՆԳՆ-ի խորհրդականները, ցեղերի հարցերով նախարարը և այլք:
