Այսօր դատավորներ Արթուր Գրիգորյանի, Գոռ Հակոբյանի և Լենա Նազարյանի մասնակցությամբ տեղի ունեցավ Քաղաքացիական անկախ և արդար դատարանի առաջին հրապարակային դատական նիստը՝ կապված Մաշտոցի պուրակի հանրային սեփականության պաշտպանության հետ: Ըստ ընթացակարգի՝ ծանուցագիր ուղարկվել է նաև քաղաքապետարան, սակայն պատասխանող կողմից որևէ մեկը չի ներկայացել: Հայցվոր կողմը դատը սկսեց առանց պատասխանող կողմի:
Հայցվորներից «Թրանսփարենսի Ինթերնեշնլ» հակակոռուպցիոն կենտրոնի ղեկավար Սոնա Այվազյանը պահանջեց՝ դատարանը որոշում ընդունի և պարտավորեցնի քաղաքապետարանին ապամոնտաժել Մաշտոցի պուրակում տեղակայված կրպակները: Նա մասնավորապես նշեց, որ Մաշտոցի պուրակում կրպակները տեղակայվել են քաղաքապետի որոշմամբ դեկտեմբերի 15-ին, ըստ որի՝ Աբովյան փողոցից ապամոնտաժված կրպակները տեղափոխվել են Մաշտոցի պուրակ՝ առանց հիմք ընդունելու օրենքով սահմանված պահանջները։ Մասնավորապես՝ Հողային օրենքի համաձայն՝ ցանկացած քաղաքաշինական որոշման հիմքում պետք է դրված լինեն Երևանի գլխավոր հատակագիծը և գոտիավորման նախագիծը։
«Տվյալ դեպքում որոշումն ընդուվել է՝ առանց հիմք ընդունելու Հողային օրեսգրքի այդ պահանջը: Քաղաքաշինության օրեսդրության համաձայն՝ Երևանի քաղաքապետարանը իրավունք չուներ ճարտարապետահատակագծային առաջադրանք տալ մի գործունեության համար, որը չի համապատասխանում քաղաքաշինական փաստաթղթերին։
Կրպակների տեղադրումը հակասում է Երևան քաղաքի գոտիավորման հատակագծին, որը ընդունվել է 2007-ին քաղաքապետարանի կողմից»,- ասաց հայցվոր Սոնա Այվազյանը՝ ավելացնելով, որ պուրակի տարածքը 10.000 քառ մետրից ավելի է, մինչդեռ ՀՀ Շրջակա միջավայրի օրենքի համաձայն՝ 1500 քառ. մետրից ավելի տարածք զբաղեցնող քաղաքաշինական գործունեությունը պետք է ենթարկվի բնապահպանական փորձաքննության: Շինարարությունը հակասել է քաղաքաշինական նորմերին, քանի որ չի պահպանվել ծառերից ավելի քան հինգ մետրի վրա կառուցելու նորմը:
Հայցվոր կողմից փաստարկներ բերեց նաև «Մենք ենք այս քաղաքի տերը» նախաձեռնության անդամ Վահրամ Սողոմոնյանը: Նա նշեց, որ քաղաքապետարանը իր բոլոր բացատրություններում նշում է, որ այստեղ գործ ունենք մասնավոր սեփականությունը հարգելու, դրա կարևորությունը գնահատելու և անհրաժեշտ փոխհատուցում տրամադրելու հետ։
«Աբովյան փողոցի վրա նույնպես մասնավոր տարածք է տրամադրվել ընկերությունններին, որոնք տարիների ընթացքում շահույթ են ստացել այդ տարածքի հաշվին և այսօր այդ տարածքը թողել անբարեկարգ վիճակում»,- ասաց Վահրամ Սողոմոնյանը՝ հավելելով, որ Մաշտոցի պուրակում մենք գործ ունենք հանրային սեփականության հետ, որը պատկանում է Երևանի ամբողջ համայնքին: Նրա խոսքերով՝ մեկ ամիս շարունակ Երևանի քաղաքացիները պաշտպանում են ոչ այլ ինչ, քան հանրային սեփականությունը՝ այգին:
«Պահանջում եմ անվավեր ճանաչել որոշումները, գտնել պատասխանատուներին ու պատժել և վերականգնել հանրային կանաչ տարածքը, ինչպես որ հարկն է՝ ՀՀ օրենսդրությամբ սահմանված կարգով»,- եզրափակեց Վ. Սողոմոնյանը։
Ի դեպ, այսօրվանից սկսվել է ի պաշտպանություն պուրակի՝ շուրջօրյա նստացույցը, իսկ դատավճիռը կկայացվի հավանաբար ուրբաթ օրը։
