Երեկ Դալմայի այգիներում տեղի ունեցած հրդեհը միտումնավոր բնույթ ուներ: Այսօր «Առաջին լրատվական»-ի հետ զրույցում նման տեսակետ հայտնեց «Դալմա-Սոնա» հիմնադրամի նախագահ Ռուզաննա Ղազարյանը`անդրադառնալով երեկ տեղի ունեցած հրդեհին:
Նա նշեց, որ Դալմայի այգիներում երեկ տեղի ունեցած հրդեհները բնականոն չեն կարող համարվել: Նրա համոզմամբ` երեկվա նման ցուրտ, քամոտ եղանակին չէր կարող բնականոն հրդեհ առաջանալ:
«Երեկ տեղի ունեցածը հաստատ միտումնավոր հրդեհ էր: Դա հայտնի սցենար է. Նորքի անտառները նույնպես այդպես արեցին: Այնտեղ, որտեղ ցանկանում են տարածքը յուրացնել, կառուցապատել, սկզբից ծառերը չորացնում են, չեն ջրում, այնուհետև վառում են, վրան շինարարական աղբ են լցնում, հետո սկսում են կառուցել այն, ինչ ծրագրել էին»,- մեկնաբանեց Ռ. Ղազարյանը` հավելելով, որ հավանաբար դա կառուցվելիք մայրուղուն է վերաբերում կամ մեկ այլ կառույցի է միտված. օլիգարխները նպատակներ ունեն Դալմայի այգիների վերաբերյալ:
Հիշեցնենք, որ մարտի 11-ին, ժամը 18.44-ին ահազանգ է ստացվել, որ հրդեհ է բռնկվել Երևանի Կուրղինյան փողոցի թիվ 23 շենքին հարակից Դալմայի այգիներում: Այս մասին տեղեկացնում էր ԱԻՆ-ը: Դեպքի վայր էր մեկնել մեկ մարտական հաշվարկ: Հրդեհը մեկուսացվել է ժամը 19.13-ին, մարվել` 19.16-ին: Այրվել է մեկ ծառ:
