Գևորգ Ալթունյանին դատի են տվել

Գևորգ Ալթունյանին երեկ դատի են տվել «Եհովայի վկաներ» կրոնական կազմակերպությունն ու մի շարք քաղաքացիներ։ Նոյեմբերի 11-ին` իր «Տեսանկյուն» հաղորդաշարի թողարկման ժամանակ, Ալթունյանն անդրադարձել էր նոյեմբերի 8-ին Սևանում տեղի ունեցած սպանության դեպքին: Հիշեցնենք, որ սպանություն կատարել էր Արման Թորոսյանը. նա խոշտանգելով սպանել էր ծնողներին: Իր հաղորդման ժամանակ Գ. Ալթունյանը, հղում կատարելով երիտասարդի հարևանների խոսքերին, նշել էր, որ Արամը Եհովայի վկա էր: Հաղորդման ընթացքում Ալթունյանը նաև հավելել է. «Սպանել էր ծնողներին, քանի որ իր Եհովան էր այդպես հրամայել։ Համենայնդեպս՝ երիտասարդ մարմնում թաքնված այդ սատանայի ծնունդը հենց այդպես էր հիմնավորել իր արարքը»: Ալթունյանը կոշտ քննադատության է ենթարկել նաև աղանդներին առհասարակ` օգտագործելով «աղանդավորների ոհմակներ», «եհովականներ կամ այլ զահրումարներ» արտահայտություններ (հաղորդումը կարող եք դիտել հետևյալ հասցեում` http://www.youtube.com/user/TesankyunARMTV#p/u/36/r3oGIvX6xjs)։
Թողարկման օրը` ուշ երեկոյան, «Եհովայի վկաներ» կազմակերպությունը տարածեց հաղորդագրություն, թե Արման Թորոսյանը «Եհովայի վկա չէ, ոչ էլ երբևէ առնչության է ունեցել Եհովայի վկաների հետ»։ Հաղորդագրության մեջ նաև նշված էր, որ Եհովայի վկաները ծնողների և մերձավորի նկատմամբ խոր հարգանք տածող մարդիկ են։ «Եհովայի վկաներն» իրենց միացած այլ կազմակերպությունների ու իրավաբանների հետ պահանջում են հերքել այն հայտարարությունը, թե իր ծնողների սպանության մեջ մեղադրվող Արման Թորոսյանը Եհովայի վկա է։ Նաև խնդրում են Ալթունյանին պարտավորեցնել «անհապաղ հրապարակայնորեն ներողություն խնդրել վերոհիշյալ սուտ տեղեկությունը տարածելու համար»։
Լրագրողի ֆեյսբուքյան էջից պարզ է դառնում, որ նա չի պատրաստվում «հանձնվել» և իր ընկերների ու համախոհների աջակցությանը պատասխանում է, որ եթե ինչ-որ մեկն օգնության կարիք ունի, դա հաստատ ինքը չի, այլ նրանք են. «Մի քիչ խառնում են, թե որ երկրում են և մի քիչ սխալ են հաշվարկել, որ իրենք ինչ ուզեն, անելու են… Էդպես չի, հաստատ»: