Բոլիվիայի նախագահ Էվո Մորալեսի առողջական վիճակը վերջին շրջանում խիստ վատացել է ՝ ոչ բավարար սնվելու և խրոնիկ հոգնածության պատճառով, հաղորդում է La Segunda պորտալը:
Հարավամերիկյան այդ հանրապետության առողջապահության նախկին նախարար Գիլերմո Կուենտասան հայտնել է, որ դա հիմնականում բացատրվում է Մորալեսի լարված աղխատանքային գրաֆիկով: Նրա խոսքերով՝ Մորալեսը երբեմն աշխատում է օրվա մեջ 20 ժամ և պարզապես չի հասցնում նորմալ սնվել ու հանգստանալ:
Նախագահի աշխատանքային օրն սկսվում է առավոտյան ժամը 5:00-ին՝ իր նստավայրում աշխատանքային հանդիպումներով, որից հետո նա մեկ-երկու աշխատանքային այց է կատարում երկրի տարբեր շրջաններ, որոնք գտնվում են տարբեր հեռավորությունների և բարձրությունների վրա:
Ամսվա սկզբին 52-ամյա Մորալեսը 2 օրով շտապ հոսպիտալացվել է Կոչաբամբա քաղաքի հիվանդանոցում, ավելի վաղ նա ենթարկվել էր լեղապարկի, ծնկների և քթի խոռոչի մի քանի վիրահատությունների:
