Մամուլում շրջանառվող լուրերը, թե «Ժառանգություն» կուսակցության ղեկավար Րաֆֆի Հովհաննիսյանի որդին՝ 1991 թվականին ծնված Վան Հովհաննիսյանը խուսափում է հայկական Զինված ուժերում ծառայությունից, անհիմն են, քանի որ վերջինս ուղղակի Հայաստանի քաղաքացի չէ, այլ՝ ԱՄՆ-ի: «Առաջին լրատվական»-ի հետ զրույցում հայտարարեց Րաֆֆի Հովհաննիսյանի օգնական Մամիկոն Սարգսյանը:
«Վան Հովհաննիսյանն այժմ սովորում է Միացյալ Նահանգներում: Հարյուր տոկոսով վստահեցնում եմ, որ նա ԱՄՆ քաղաքացի է»,- կրկնեց Սարգսյանը:
Հարցին՝ ո՞րն է այդ դեպքում, իր կարծիքով, բարձրացված աղմուկի պատճառը, Րաֆֆի Հովհաննիսյանի օգնականը նշեց. «Դե դա էլ թողնում եմ Ձեզ»:
Հիշեցնենք՝ «Իրավունք» թերթի հրապարակման համաձայն՝ «Ժառանգություն» կուսակցության համագումարից հետո բազմաթիվ վրդովված զանգեր են ստացել: Ընթերցողները պնդել են, որ Րաֆֆի Հովհաննիսյանը կյանքում հայրենասիրական ճառերին հակառակ քայլեր է իրականացնում, որի որդին` 1991 թ. ծնված Վան Հովհաննիսյանը, վաղուց պետք է ծառայեր հայկական բանակում: Սակայն Պուշկինի անվան դպրոցն ավարտելուց հետո մեկնել է ԱՍՆ և անգամ միտք էլ չունի վերադառնալ Հայաստան և ծառայել հայկական բանակում: «Ահա այսպիսին է Րաֆֆի Հովհաննիսյանի հայրենասիրությունը, որը սկսվում ու ավարտվում է խոսափողի մոտակայքում»,- գրել էր թերթը:
