Հայաստանն ԱՊՀ երկրներում ամենալավ ցուցանիշներն ունի կին դատապարտյալների թվի առումով: Տարեվերջին այսպիսի հայտարարություն արեց ՀՀ արդարադատության նախարար Հրայր Թովմասյանը` ընդգծելով որ ապագայում կառուցվելիք նոր տիպի քրեակատարողական հիմնարկները ավելի լավ պայմաններ կապահովեն նաև կին դատապարտյալների համար:
Հայաստանի Հանրապետության արդարադատության նախարարության քրեակատարողական հիմնարկներում ցմահ ազատազրկման դատապարտված կին դատապարտյալներ այս պահին չկան: Սակայն ԱՆ «Աբովյան» քրեակատարողական հիմնարկում, ընթացիկ տարվա փետրվարի 22-ի դրությամբ, պահվում է թվով 142 կին դատապարտյալ և կալանավորված 52 կին: Ընդ որում, կին դատապարտյալների շրջանում հիմնականում գերակշռում են ՀՀ Քրեական օրենսգրքի 178` խարդախություն հոդվածով դատապարտվածները:
Նշենք, որ 2011 թ. հուլիսի 1-ի դրությամբ՝ ազատազրկման վայրում են գտնվել 199 կին (2010 թ. առաջին կիսամյակում՝ 183), որից 25-ը` սպանության, 50-ը` խարդախության, 1-ը` կավատության, 12-ը` գողության, 25-ը` թմրամիջոց իրացնելու, 9-ը` դիտավորությամբ առողջությանը ծանր վնաս պատճառելու մեղադրանքով:
Ի դեպ` կառավարությունն այս տարվա հունվարի 12-ի նիստում մի հետաքրքիր որոշում ընդունեց կին դատապարտյալների հիգիենայի պահպանման առումով, որով ավելացրեց կին դատապարտյալներին տրամադրվող հիգիենիկ պարագաների քանակը: Քրեակատորաղական հիմնարկներում պահվող կին դատապարտյալները 1 ամսվա կտրվածքով կստանան ոչ թե 5, այլ 10 հիգիենիկ պարագա: Որոշումը թեև բավական ծիծաղելի արձագանքներ ունեցավ, սակայն քրեակատարողական հիմնարկներում պատիժը կրողների համար այն, ամեն դեպքում, մեծ նշանակություն ունի:
