«Ցանկացած փոփոխվող հասարակությունում մարդկանց համար դժվար է լինում ադապտացվել, բայց քանի որ կանանց ադապտացիոն հնարավորություններն ավելի մեծ են, նրանք ավելի հեշտ են կարողանում այդ փոփոխություններին և դժվարություններին դիմակայել»,- «Առաջին լրատվական»-ի հետ զրույցում ասաց հոգեբան Արմեն Սողոյանը:
Ըստ հոգեբանի՝ հայ կանայք ավելի ադապտացված են, քանի որ հայերի համար պատմականորեն ավելի դժվար է եղել, իսկ հայ տղամարդկանց շրջանում ադապտացումն ավելի դժվար է. «Դրա համար հայ կանայք ավելի ուշադիր պիտի լինեն իրենց ամուսինների հանդեպ, մենք ասում ենք՝ տղամարդիկ են ուժեղ, սակայն հոգեբանական առումով դժվարություններին կանայք ավելի հեշտ են դիմագրավում, սակայն դա չի նշանակում, որ կանայք անխոցելի են»: Հոգեբանը խորհուրդ տվեց, որ կանայք հետևեն իրենց առողջությանը՝ հոգեպես և ֆիզիկապես, քանի որ այսօր բազմաթիվ հիվանդություններ ժամանակին հայտնաբերելու դեպքում 100 տոկոսով բուժվում են:
Նա հերքեց այն տեսակետը, թե հայ տղամարդը ուշադիր չէ հայ կնոջ հանդեպ. «Հայ տղամարդիկ շատ դեպքերոմ հասարակության մեջ որոշակի կերպար են ընդունում, բայց նրանք անուշադիր չեն, կան որոշակի տրադիցիաներ, բայց դա ուշադրության հետ կապ չունի: Կինը կարող է ընտանիքում շատ աշխատել, դա կապված է տվյալ ընտանիքում դերերի բաշխման հետ, սակայն դա չի նշանակում, որ կինը գնահատված չէ»: Նա ասաց, որ ուշադրությունն ու գնահատված լինելը կնոջ համար ամենաառաջնային բաներն են, ինչի բացակայության պայմաններում կանանց շրջանում էմոցիոնալ ոլորտի խանգարումներ են լինում. «Ընդհանրապես, տղամարդիկ կանանց շատ ավելի շատ են սիրում, քան ցույց են տալիս, հատկապես հայ տղամարդիկ, այսինքն՝ հայ կանայք պետք է իմանան, որ իրենք շատ սիրված են, անկախ նրանից՝ դա ցույց տրվում է իրենց, թե՝ ոչ»:
Հոգեբանը շնորհավորեց բոլոր կանանց Մարտի 8-ը, նրանց մաղթեց, որ լինեն առողջ՝ մարմնով և հոգով, երջանիկ, գնահատված, շրջապատված լինեն այն մարդկանցով, ում կարիքն ունեն:
