ԱՄՆ-ը հույս ունի Ռուսաստանի հետ ՀՀՊ-ի վերաբերյալ պայմանագիր կնքել և պատրաստվում է այդ թեման մանրամասն քննարկել մայիսի վերջին Չիկագոյում կայանալիք Ռուսաստան-ՆԱՏՕ խորհրդի հանդիպմանը: Այս մասին, ինչպես հաղորդում է RIA Novosti-ն, հայտարարել է ԱՄՆ պետքարտուղար Հիլարի Քլինթոնը:
«Ինչպես ասել ենք, մենք շատ կցանկանայինք համագործակցել Ռուսաստանի հետ ՀՀՊ-ի և ընդհանուր սպառնալիքները հաղթահարելու ոլորտներում: Սա ոչ միայն ԱՄՆ-ի, այլև ՆԱՏՕ-ի դիրքորոշումն է, որը մենք նախատեսում ենք քննարկել Ռուսաստան-ՆԱՏՕ խորհրդի նիստին: Առայժմ մենք բավարար չափով առաջընթաց չենք նկատում, սակայն պատրաստ ենք շարունակել երկխոսությունը ռուսների հետ և հույս ունենք, որ արդյունքում որոշակի համաձայնության կգանք, որը կբավարարի երկու կողմերին»,- ասել է Քլինթոնը երեկ տեղի ունեցած մամուլի ասուլիսում:
Այնուամենայնիվ, Քլինթոնը նշել է, որ իրենք չեն հրաժարվի ՀՀՊ համակարգ ստեղծելու ծրագրից:
Ավելի վաղ ՌԴ և ԱՄՆ պաշտոնատար անձինք հայտնում էին, որ ՀՀՊ-ի շուրջ բանակցությունները գործնականում փակուղի են մտել, քանի որ ԱՄՆ-ը հրաժարվում է գրավոր երաշխիքներ ներկայացնել առ այն, որ այդ համակարգն ուղղված չէ Ռուսաստանի դեմ: Ընդ որում, երկու կողմերն էլ կասկածում էին, որ Չիկագոյի գագաթնաժողովը տեղի կունենա:
