ՀՀԿ-ական պատգամավոր Կարինե Աճեմյանը ցանկանում է, որ կանայք կարողանան ներդաշնակություն ապահովել ինչպես հասարակական, այնպես էլ ընտանեկան կյանքում: Այսօր լրագրողների հետ հանդիպմանը նման մաղթանք հղեց նա` կանանց շնորհավորելով մարտի 8-ի տոնի առթիվ:
«Մարդուն կրթում, կյանքի է մղում կինը, և այդ է պատճառը, որ ցանկանում եմ` հասարակական կյանքում ներգրավված լինեն ներուժ ունեցող, խելացի կանայք»,- ասաց նա:
Խոսելով տոնական անակնկալների մասին` Աճեմյանը նկատեց, որ բոլոր կանայք էլ սիրում են նվերներ ստանալ, սակայն ավելի կարևոր է սիրելի մարդուց այն ստանալը: «Աղջիկս էլ, ամուսինս էլ իմ նախասիրությունները գիտեն և միշտ բծախնդրությամբ են ընտրում դրանք, ես էլ հաճույքով ընդունում եմ նրանց նվերները»:
Ասուլիսի մյուս բանախոս, ՕԵԿ պատգամավոր Հեղինե Բիշարյանն իր հերթին նկատեց, որ հայ կանայք տղամարդկանց հետ հավասար բեռ են կրում իրենց ուսերին: «Դրա համար էլ նրանց սկզբունքայնություն, ուժ եմ մաղթում: Կանայք թող միշտ լինեն բոլորի ուշադրության կենտրոնում, և թող իգական սեռի ներկայացուցիչները բոլոր բնագավառներում որքան հնարավոր է` շատանան, նրանց թիվը թող ավելանա նաև խորհրդարանում: ԱԺ-ում կանայք, շատ ու շատ տղամարդկանց հետ համեմատած, բավական ակտիվ են աշխատում»,- նկատեց նա:
Թե նվերն ինչպիսին է` Հեղինե Բիշարյանը երբեք չի քննարկում, սակայն խիստ կարևորում է` ով է իրեն նվեր տալիս: «Բայց ավելի կարևոր է, որ ամուսինն ու երեխաները մշտապես ուշադրության կենտրոնում պահեն կնոջը»,- շեշտեց նա:
ՀՅԴ պատգամավոր Ռուզան Առաքելյանը ևս, Մարտի 8-ի առթիվ շնորհավորելով կանանց, նշեց, որ ցանկանում է առանձնակի շնորհավորել Արցախյան ազատամարտում զոհված տղաների կանանց, մայրերին ու դուստրերին:
«Չէի ուզի շաբլոն հնչեր, բայց ամենալավ նվերը ծաղիկներն են: Բացի այդ, ինձ համար ամենաթանկը հայրիկիս նվերներն են, որոնք հիմա` նրա չլինելուց հետո, ավելի արժեքավոր են: Նա ուսուցիչ էր, և մինչև հիմա պահում եմ խունացած էջերով, առաջին դասարանում ինձ նվիրած Հովհաննես Թումանյանի հեքիաթների գիրքը»:
Ամփոփելով` երեք կին պատգամավորներն էլ հավաստիացրին, որ երբեք տղամարդ պատգամավորների կողքին չեն «նեղվել» և արական սեռի հետ նույն իրավունքներն ունեն: «Եթե խեղճ լինես, ամեն ինչ ձեռքիցդ կվերցնեն: Պետք է ուժեղ լինել»,- ասաց Հեղինե Բիշարյանը:
