«Հայ կին, այսինքն՝ առաքինի, այսինքն՝ միշտ սիրելի: Կինը գեղեցկության և սիրո խորհրդանիշ է, շնորհավոր բոլորի տոնը՝ լինի քույր, մայր, տատիկ, և անգամ նրանը, ով դեռ չի ծնվել, որովհետև չգիտենք, թե ծնվի՝ ինչ է դառնալու»,-«Առաջին լրատվական»-ի հետ զրույցում նշեց երգիչ Ռուբեն Մաթևոսյանը և ավելացրեց. «Գարունը սկսվում է կանանց տոնով, և ինչ երջանիկ ենք, որ իրավունք ունենք մեծարելու հայ կնոջը, կին, որ նույնացել է հայրենիք հասկացության հետ, մարդ, որ մայր է և ծնել գիտի, ով կարողացել է պահել թե՛ լեզու, թե՛ պատիվ, թե՛ օջախ»:
Երգչի կարծիքով՝ հայ կինը չի ընդհանրանում աշխարհի կին հասկացողության հետ. «Ես ուզում եմ զատել հայ կնոջը, որովհետև նա իր նշանակությամբ և իր դերով ավելի բարձր է կանգնած, քան որևէ մեկը: Ինչ լավ է, որ Հայաստան աշխարհում այն ոչ թե մեկ օր է, այլ մի ամբողջ ամիս, ինձ համար՝ ամեն վայրկյան, ամեն ժամ, մի ամբողջ կյանք»:
