ԱՄՆ պետքարտուղար Հիլարի Քլինթոնը երեկ պատրաստակամություն է հայտնել աշխատելու Վլադիմիր Պուտինի հետ՝ նախագահի պաշտոնը ստանձնելուց հետո: Այսպիսի հայտարարություն նա արել է լեհ իր գործընկեր Ռադոսլավ Սիկորսկու հետ հանդիպումից հետո: Այս մասին հաղորդում է RIA-Novosti գործակալությունը:
«Նախագահական ընտրություններն ավարտվել են Պուտինի ակնհայտ հաղթանակով, և մենք պատրաստ ենք աշխատել նրա հետ այն բանից հետո, երբ նա կստանձնի այդ պաշտոնի պատասխանատվությունը»,- ասել է Քլինթոնը: Միաժամանակ նա շեշտել է, որ անհրաժեշտ է հաշվի առնել և վերացնել այն բացերն ու խախտումները, որոնք եղել են ընթացիկ ընտրությունների ժամանակ:
Քլինթոնն իր մտահոգությունն է հայտնել Ռուսաստանում ընդդիմադիրների ձերբակալությունների կապակցությամբ:
Հիշեցնենք, որ Պուտինը հաղթել էր մարտի 4-ին անցկացված նախագահական ընտրությունների ժամանակ` հավաքելով ձայների 63,6%-ը: