Շվեդիայի ավտոմոբիլային Volvo ընկերության երեք աշխատակիցներ հեռացվել են աշխատանքից գործատուի հասցեին Facebook սոցիալական ցանցում արած քննադատական գրառումների պատճառով: Այս մասին հաղորդում է РИА Новости-ն:
Նրանցից մեկի հեռացման առիթ է դարձել հետևյալ գրառումը. «Եվս մեկ աշխատանքային օր այս գժանոցում»: Ըստ ընկերության ղեկավարության` այս խոսքերը չի կարելի արդարացնել ո՛չ աշխատակցի մոր մահվան պատճառով նրա ճնշվածությամբ, ո՛չ էլ նախկինում նույն սոցիալական կայքում Volvo-ի հասցեին հնչեցրած գովեստի խոսքերով: Մյուս երկու աշխատակիցները մեղանչել են` թողնելով «ոչ լոյալ» մեկնաբանություններ հիշյալ կարգավիճակի տակ:
Ներկա դրությամբ Շվեդիայի LO արհմիությունը չի կանոնակարգում սոցիալական համացանցային ռեսուրսների օգտագործումը,- Ice News պարբերականին հաղորդել է դրա ներկայացուցիչ Յոհան Ինգելսկոգը, որը, սակայն, քննադատել է Volvo-ի ղեկավարության քայլը:
Շվեդական ավտոհսկայի մամուլի ծառայության ղեկավարն իր հերթին հայտարարել է, որ «ձեռնարկության բոլոր աշխատակիցները պետք է պահպանեն ընկերության էթիկայի կոդեքսում ամրագրված վարքի կանոնները»:
Հիշեցնենք, որ նախկինում նմանատիպ դեպքեր արձանագրվել էին նաև ԱՄՆ-ում և Մեծ Բրիտանիայում: