«Երիտասարդ աղջիկները պետք է գիտակցեն, թե ինչքան կարևոր դեր ունեն հասարակական կյանքում»,- կարծում է ՀՀ երիտասարդ կանանց ասոցիացիայի նախագահ Լիլիթ Ասատրյանը: Նրա ղեկավարած ասոցացիան, որ գործում է Հայաստանում 2004 թվից ի վեր, նպատակ ունի բարձրացնել կանանց դերը հասարակական կյանքում, խթանել կանանց զբաղվածության մակարդակի բարձրացումը, աջակցել կանանց խնդրիների լուծմանը: Այս առաքելությունը իրականացնելու համար ասոցիացիան իրականացնում է կրթական ծրագրեր, կազմակերպում դասընթացներ, քննարկումներ և այլն: «Ասոցիացիայի կազմակերպած միջոցառումներում մենք տեղեկացնում ենք աղջիկներին իրենց իրավունքների ու պարտականությունների մասին»,- համոզված է երիտասարդ կանանց ասոցիացիայի նախագահ Լիլիթ Ասատրյանը: Մեր հարցին, թե ինչպես է աջակցում ասոցիացիան Հայաստանում կանանց իրավունքների պահպանմանը և կանանց հանդեպ բռնության դեմ պայքարին Լ. Ասատրյանը պատասխանեց. «Այդ հարցը մեր մանդատի մեջ չի մտնում: Ես՝ որպես կին ու քաղաքացի, իհարկե դեմ եմ բռնությանը, սակայն պետք է նշել, որ նույնիսկ ամենազարգացած երկրներում կատարվում են բռնություններ կանանց հանդեպ»: Լ. Ասատրյանի խոսքով, կանանց իրավունքների պահպանմամբ զբաղվում են այլ ՀԿ-ներ. «Մենք փորձում ենք վերացնել բռնության պատճառները: Եթե կանայք լինեն կայացած ու իմանան իրենց իրավունքները, ապա բռնության դեպքերի թիվն էլ կկրճատվի»,- կարծում է երիտասարդ կանանց ասոցիացիայի նախագահը: