ՀՅԴ խմբակցության անդամ, պատգամավոր Լիլիթ Գալստյանը և Սոցիալ-դեմոկրատ հնչակյան կուսակցության վարչության ատենապետ Լյուդմիլա Սարգսյանը այսօր հյուրընկալվել էին «Տեսակետ» ակումբում` խորհրդարանում կին-տղամարդ փոխհարաբերությունները և նախընտրական ցուցակներում կանանց ներգրավվածությունը թեմայի շրջանակներում:
Լիլիթ Գալստյանը անդրադառնալով հասարակական-քաղաքական կյանքում կնոջ դերին՝ նշեց, որ նրանց մասնակցությունը միայն հարստացնում է տվյալ երկիրը: «Երբ գտնվում ենք բռնաբարված իրավունքների շրջանում` ճիշտ չէ խոսել միայն կանանց իրավունքների մասին: Առհասարակ քաղաքակրթական երևույթ է կանանց ներուժի օգտագործումը տվյալ երկրում»,- կարծում է դաշնակցական պատգամավորը՝ հավելելով, թե իրականում հիբրիդային պետություն ենք, մինչդեռ սահմանադրորեն ժողովրդավարական, իրավական, սոցիալական պետություն պետք է լինենք:
Լյուդմիլա Սարգսյանը նկատեց՝ այն կանայք, որոնք կարողանում են դուրս գալ խոհանոցներից, նրանք կարողանում են ձեռքբերումներ ունենալ: «Տղամարդիկ երբեմն չեն հաշտվում այն մտքի հետ, որ կինը կարող է իրենց հավասար՝ առաջ ընթանալ: Երբ կինն է մտնում պայքարի մեջ` իհարկե, շատ խոցելի է դառնում: Կանանց ներկայությունը գալիք խորհրդարանում կարծես ավելին է լինելու, բայց կինը այնքան կարևորված պետք է լինի, որպեսզի այդ ներկայությունը քվոտաների հիման վրա չլինի»,- նշեց Լ. Սարգսյանը:
Ընդդիմադիր քաղաքական գործչի կարծիքով՝ ամեն ինչ կախված է նրանից, թե ինչ պահանջներ է ներկայացնում կինը և ինչպես է պաշտպանում իր պահանջները, իրավունքները: «Կնոջ դերը ավելի է կարևորվելու, կինը մեծ անելիքներ ունի այսօրվա իրականությունում»,- նշեց Լ. Սարգսյանը:
Անդրադառնալով կանանց ներգրավվածությանը հաջորդ խորհրդարանում՝ դաշնակցական պատգամավորը նշեց, որ ՀՅԴ համամասնական ցուցակում կպահպանեն օրենքի պահանջը. «Եթե մեր կուսակցությունը գտնի, որ ես պետք է ծառայեմ կուսակցությանը` կծառայեմ, բայց ցուցակը պետք է որոշի ՀՅԴ ԳՄ-ն»:
Նա կարևորեց կուսակցությունների ներքին ժողովրդավարությունը և դեմ արտահայտվեց քաղաքական դաշտում մեկ մարդու քաղաքական ակումբներին, որոնք ձգտում են միայն իշխանության և իշխանության պահպանման:
Լ. Սարգսյանը նշեց, որ ՀԱԿ-ում կան ակտիվ, արժանի կանայք, և կարծում է՝ երեք-չորս կին կլինի նոր խորհրդարանում: «Մենք չենք փորձում տղամարդկանց տեղը զբաղեցնել, մենք փորձում ենք նրանց լրացնել»,- նկատեց Լ. Սարգսյանը:
«Նախ՝ պետք է նվաճել այդ իրավունքը, կողմնորոշված քաղաքացիական անհատ լինելու խնդիր ունենք՝ անկախ սեռից: Իմ արժանապատվությունը վիրավորված կհամարեմ, եթե ես որևէ տղամարդու լրացնեմ. ես ինքս եմ նպատակ դնում և առաջ ընթանում»,- հակադարձեց դաշնակցական պատգամավորը:
