Փետրվարի վերջին ԶԼՄ-ներում տարածվեց մի հայտարարություն, որտեղ հայ էստրադայի երգիչ-երգչուհիների զգալի մասն իր վրդովմունքն արտահայտեց «Եվրատեսիլ-2012»-ին մասնակցության դեմ: Երգիչներին վրդովվեցրել էր հատկապես այն, որ փետրվարի 23-ին հակառակորդի դիպուկահարի գնդակից Չինարի գյուղի մոտ սպանվել էր 20-ամյա զինծառայող Ալբերտ Ադիբեկյանը: Արդեն հայտնի է, որ զինծառայողն սպանվել է իր ծառայակցի կողմից:
Այս առնչությամբ «Առաջին լրատվական»-ը երգչուհի Ալլա Լևոնյանի հետ զրույցում փորձեց հասկանալ` ինչ է մտածում երգչուհին մրցույթի մասնակցության մասին, երբ հայտնի է դարձել, որ սպանության մեջ այս անգամ ադրբեջանական կողմը մեղավոր չէ:
Վերջինս մեզ հետ զրույցում ասաց, որ դա ոչինչ չի փոխում, թեև չէր լսել, որ ադրբեջանական կողմը չի սպանել: «Ես այդ նամակը չեմ էլ տեսել, պարզապես զանգել-հարցրել են` համաձայն ես միանալ, ասել եմ`այո: Նախկինում էլ եմ ասել, որ եթե այնուամենայնիվ, գնալու ենք, պետք է ամեն ինչ հավուր պատշաճի կատարվի, ոչ մի թերի տեղ չլինի: Լավ, այս անգամ նրանք այդ զինվորին չեն սպանել, բայց ինչ կարևոր է` երբ է եղել, նամակից 1, թե՞ 10 օր առաջ: Միևնույն է, էլի կանեն այդ նույն բանը»:
Հարցին` արդյոք նա երբևէ մասնակցե՞լ է որևէ հասարակական նախաձեռնության` կանխելու համար բանակում զինվորների սպանության դեպքերը, վերջինս պատասխանեց, որ իր մասնակցությունը ի՞նչ կփոխի` դրանից դեպքերը չեն պակասի: «Բանակը հղկվող ժամանակաշրջանում է գտնվում, բանակում ես լինեմ, ով էլ լինի, լինելու բանը լինելու է: Ես կրակի տակ «Եղնիկներում» երգել եմ զինվորների ձեռքը բռնած: Դա ավելի լա՞վ չէ, քան կանգնեմ ու ասեմ` ինչու է բանակում այսպես, ով է մեղավոր:
Մեղավորներին պետք է ընդամենը գտնել ու պատժել: Ո՞վ կարող է երաշխավորել, որ ես իմ բարեկամին կարող եմ պաշտպանել, որ նա չընկնի վթարի տակ»,- նշեց երգչուհին` ընդգծելով, որ ինքն այս պահին էլ ունի բարեկամներ, որ ծառայում են բանակում, ու շատ է ուզում, որ ամեն ինչ լավ լինի, սակայն ինչ կփոխվի իր ուզելուց: «Բոլորն են ուզում, որ լավ լինի»,- ասաց Ալլա Լևոնյանը:
