Associated Press-ի հաղորդմամբ՝ Լիբիայի մի շարք ցեղերի առաջնորդներ և մի քանի զինված խմբերի հրամանատարներ երկրի շրջաններից մեկը հայտարարել են կիսաինքնավար:
Գործակալության տվյալներով՝ այդ շրջանը գտնվում է Լիբիայի կենտրոնական հատվածում՝ Սիրթ քաղաքի մոտ և արևելքից սահմանակցում է Եգիպտոսին: Շրջանի կիսաինքնավար կարգավիճակի վերաբերյալ հայտարարությունն արվել է Բենղազիում՝ ցեղերի առաջնորդների և հրամանատարների հավաքի ժամանակ: Բացի այդ, ստեղծվել է նոր տարածքային միավորի առաջնորդների խորհուրդ՝ այն կառավարելու համար:
Լիբիայի Ազգային անցումային խորհուրդը, որն այս պահին կառավարում է երկիրը, խնդրել է այդ ցեղերի առաջնորդներին նման հայտարարություն չանել՝ նշելով, որ դա կարող է հանգեցնել միասնական պետության տապալմանը:
Հիշեցնենք, անցյալ տարվա փետրվարի կեսերից Լիբիայում սկսվեցին զանգվածային հուզումներ, որոնք ի վերջո հոկտեմբերի վերջին հանգեցրին Մուամար Քադաֆիի 40-ամյա վարչակարգի տապալմանը: Դրանից հետո, սակայն, երկրում դրությունը չկայունացավ, քանի որ մինչ այժմ հաճախակի բախումներ են տեղի ունենում Քադաֆիի հակառակորդների և կողմնակիցների, տարբեր ցեղերի միջև:
