Թուրքական Taraf թերթի փոխանցմամբ՝ TR325 ծածկագրով և «Ֆարուք Դեմիր» անունով աղբյուրը հայտնել է, որ Էրդողանի վերջին վիրահատությունից (նկատի է առնվում 2011 թվականի նոյեմբերի 26-ի առաջին վիրահատությունը) հետո բժիշկներն Էրդողանին հայտնել են, որ նա ունի աղիքի քաղցկեղ: Այս մասին նշված է ամերիկյան Stratfor հետախուզա-վերլուծական կենտրոնի նամակագրությանն առնչվող WikiLeaks-յան բացահայտումներից մեկում:
Վիրահատության ժամանակ Էրդողանի հաստ աղիից կտրել են 20 սանտիմետր (սովորաբար դրա երկարությունը կազմում է 1.5 մետր): Բժիշկներն Էրդողանին հայտնել են, որ նրա վերջնական ախտորոշման համար անհրաժեշտ է իրականացնել երկրորդ բիոպսիան և սպասել դրա արդյունքներին: Փետրվարի 10-ին Էրդողանը ենթարկվում է երկրորդ վիրահատության, իսկ բժիշկները նրան հայտնում են, որ արդյունքները հուսադրող չեն. նրան մնացել է երկու տարվա կյանք:
Նշվում է, որ այս ամենը մեծ գժտություններ կարող է առաջացնել Էրդողանի գլխավորած, իշխող «Արդարություն և զարգացում» կուսակցության (ԱԶԿ) ներսում: Նախագահ Գյուլը մեծ աջակցություն չի վայելում, արտգործնախարար Դավութօղլուն ցավագին է մոտենում բոլոր նրանց, ովքեր ցանկանում են «փորել իր տակը»: Էրդողանն իր հերթին վստահում է փոխվարչապետ Ալի Բաբաջանին և Էներգետիկայի ու բնական պաշարների նախարար Թաներ Յըլդըզին:
Հայտնի չէ, թե ինչպիսին կլինեն ԱՄՆ-ի, հիմնական ընդդիմադիր Ժողովրդա-հանրապետական կուսակցության (ԺՀԿ) և բանակի արձագանքները: