«Nabucco-ն և ռուսական South Stream-ը կարող են միավորվել մեկ նախագծի մեջ», կարծում է Իտալիայում ԱՄՆ դեսպան Դեյվիդ Թորնը իտալական La stampa պարբերականին տված հարցազրույցում, հաղորդում է newsgeorgia-ն: Դեսպանի կարծիքով, դա կապված է իտալական էներգետիկ ENI ընկերության դիրքորոշման փոփոխության հետ: Ընկերությունը, որը South Stream նախագծով ռուսական կողմի հիմնական գործընկերն է, վերջերս հանդես է եկել երկու մրցակից նախագծերը միավորելու առաջարկով: Դեսպան Թորնի կարծիքով, ENI-ի դիրքորոշման փոփոխությունը Հռոմում և Վաշինգտոնում անցկացված մի շարք հանդիպումների հետևանք է, որոնց մասին դիվանագետը հրաժարվել է մեկնաբանություններ տալ: Հայտնի է, որ Եվրամիությունը աջակցում է Nabucco-ին, որի ստեղծման նպատակը Ռուսաստանի վառելիքին այլընտրանքի ապահովումն ու ռուս-ուկրաինական հավանական գազային կոնֆլիկտներից խուսափումն է, ինչի պատճառով եվրոպական երկրները զրկվում են գազից: Սակայն ռուսական South Stream-ը նույնպես նախատեսված է նույն սպառողներին, որոնք օգտվելու են Nabucco-ից, և հնարավորություն ունի երկու անգամ ավելի շատ գազ մղել Եվրոպա, քան Nabucco-ն: Առաջիկա օրերին Եվրահանձնաժողովի ղեկավար Ժոզե Մանուել Բարոզուն բանակցություններ է վարելու Ադրբեջանում և Թուրքմենստանում, որոնք էլ նախատեսվում է, որ կապահովեն Nabucco-ով առաքվելիք վառելիքի զգալի մասը: Այդ հանդիպումների ընթացքում ընդունվելիք որոշումները մեծ ազդեցություն կունենան դեպի Եվրոպա էներգառեսուրսների առաքման հարցում:
