Հունաստանին մինչև 2015 թ. կարող է անհրաժեշտ լինել մինչև 50 մլրդ եվրոյի չափով ֆինանսական նոր փաթեթ: Այս մասին գրում է գերմանական Spiegel Online ամսագիրը:
Եվրահանձնաժողովը, Եվրոպական Կենտրոնական բանկն ու ԱՄՀ-ն արդեն հավանության են տվել Հունաստանին դեֆոլտից փրկելու համար անհրաժեշտ երկու փաթեթներին:
Եվ այսպես, 2010 թ. մայիսին Եվրագոտու երկրները և ԱՄՀ-ն Հունաստանին հատկացրին 110 մլրդ եվրո վարկ, որից ավելի քան 70 մլրդն արդեն տրամադրվել է: Իսկ 2012 թ. փետրվարին առաջին փաթեթին հաջորդեց երկրորդը` 130 մլրդ եվրոյի չափով` գումարած մասնավոր ներդրողների 100 մլրդ դոլարանոց վարկային պարտքի մարման ծրագիրը:
Այդուհանդերձ, Spiegel-ի տվյալներով՝ Հունաստանի բյուջեի կայունությունը մինչև 2015 թ., երբ ավարտվում է ընթացիկ ծրագիրը, լուրջ կասկածներ է առաջացնում վարկատուների շրջանում, առաջին հերթին՝ Գերմանիայի: Ընդ որում, հենց Գերմանիան էր պնդում, որ բացառեն ընթացիկ կանխատեսումներից «զգուշավոր» գնահատականը, որպեսզի փաստաթուղթը հեշտությամբ անցներ քվեարկությունը խորհրդարանում,- գրում է ամսագիրը` հավելելով, թե Աթենքին կարող է անհրաժեշտ լինել ևս 50 մլրդ եվրո:
Արդեն 2012 թ. խորը ռեցեսիայի հետևանքով Հունաստանի բյուջեի եկամուտները նվազել են 470 մլն եվրոյով` ի հեճուկ կանխատեսումների, իսկ ծախսերն աճել են 951 մլն եվրոյով,- նկատում է RIA Novosti գործակալությունը:
